Vawiin chawhnu khan Lunglei High Powered Committee Vice Chairman Pu S. Laldingliana hoin a pisaah MJA member-te, YMA Lunglei Sub-Hqrs leh Chhimbial Chhantu hruaitute nen Mizoram chhim lama thlawhtheihna tum hmun ni thei tur awma ngaih te thlirhona an nei.

Pu S. Laldingliana chuan Lunglei DC kaihhruaina hnuaia Lunglei Airport Survey Committee din a nih atang tawh in, YMA hruaitu anga thlawhtheihna tum hmun an lo zawn tawh thu a sawi a. Thlawhtheihna tum hmun zawn chu a awl ai lo in, kan la vanneih lo a ni a ti a, beiseina erawh an la neih reng thu a sawi. Kal khawmte chu hma an lakna hrang hrang ah an lo phur pui thin chu lawmawm a tih thu a sawi a, hriatpuitu ni tur leh thawhpui atan a sawm nghal a ni. Saitluk, Thlisam, Lungsen, Vuakmual, Mampui, Siaha leh Saihum ah te an lo enfiah tawh thu a sawi bawk.

He hunah hian July ni 21, 2016 (Thursday)-a Phaileng South-ah Tlangdung hmun an enfiah tawh chu thlirletna nei in, km 3 chuang a sei a nih thu hriat a ni a, mahse a chhehvel tlang te avangin hmun dang en tha an ti a. Chithar-Vaisam leh South Chawilung a tlangdung te chu zir chiang in, a hmun ah enfiah leh thuai nise tiin an rel.