No.448/2020-2021 

Nimin April ni 18, 2020 (Inrinni) a Mizoram hmun hrang hranga thli leh ruahpui thawkah khan Aizawl West-I Bial chhungah Sihhmui, Sairang Dinthar, Sairang leh Phunchawngah te In engmaw zat a chhiat bakah, mihring thihna hial a thleng tih hriat a ni a. Hetiang vanduaina a thleng a ni tih a hriat veleh, ruah sur leh thlipui pawh pawisa lovin Aizawl West-I Bialtu MLA Pu Zothantluanga chuan a bial chhunga chhiat tawhna hmun hrang hrang chu panin nghalin, a che chhuak nghal a ni.

Bialtu MLA Pu Zothantluanga chuan Dinthar Sairang Venga Pu Bishar Hemran-a fanu Lallawmzuali (thla 4 mi), an In luah lai thing tluin a delh avanga boral ta an lakna hmun Sairang PHC chu pan nghalin, a ruang an lakna hmun leh a vuina inkhawm an hmanna tur Dinthar Sairang Hall-ah a vui liam zawh thlengin hun a hman pui nghal a. Dinthar Sairang Khawtlang hruaitute sawmna angin Lalawmzuali vuinaah hian thu a sawi bakah, mitthi hi Rs.5,000/-  in a ral nghal bawk a ni. Mitthi vui zawh hnu hian, Dinthar Sairang Khawtlang hruaitute hnenah, thli pui leh ruahin a tih chhiat avanga an khawtlang hnatlang te thingpui inna turin Rs.5,000/- leh Silpauline 2 a pek bakah, thlai chi engemaw zat a hlan nghal a. 

Dinthar Sairanga hun a hman zawh hnuah Pu Zothantluanga chu Sairang-ah phei leh nghalin, Sairang Khawtlang hruaitute hnenah thli chhia leh ruah surin hatsatna a thlen avanga hnatlang te thingpui inna turin Rs.5,000/- leh Silpauline pahnih a pek bakah, thlai chi engemaw zat chu Sairang khawtlang hruaitute hnenah hian a hlan leh bawk a ni. Pu Zothantluanga chuan Sihhmui, Phunchawng leh Rangvamual Veng te pawh tlawh nghalin, Sihhmui khawtlang hruaitute hnenah Silpauline 2 leh thlai chi engemaw zat a hlan a. Phunchawng leh Rangvamual Duty te hnenah pawh an mamawh te a hnena thlen zel turin leh, a hnena an thlen apiang chu a bawhzui nghal zel dawn thu a hrilh bawk a ni. 

Aizawl West-I Bialtu Pu Valtea hian a bial chhunga veng/khaw hrang hrang hruaitute hnenah, nimina thlipui leh ruahpui thawkin an veng/khua a harsatna a thlen te chu rawn hrilh zel turin leh ṭanpui an ngaihna zawnah a rawn ṭanpui zel dawn thu te a hrilh bakah, Sorkar aṭanga ṭanpuina awm thei ang ang te pawh a zawnpui dawn thu a hrilh hlawm bawk a ni.