Chhiatrupna lo thlen thulha Media mite mawhphurhna inhrilh hriatna, Training of Journalists in Disaster Management chu vawiin khan I & PR Conference Hall-ah Administrative Training Institute leh I & PR Department buatsaihin neih a ni.
Training hi Aizawl atanga chhuak chanchinbu leh TV Network zawng zawng aiawhte tana tih a ni a. ATI Director Pi Ramdinliani leh I & PR Director Pu Jim K. Chozah ten an hmanpui a. Chanchinthar thehdarhtute an kal tha hle a ni. Training hi Pi Angela Zothanpuii, Joint Director, ATI in a kaihruai a ni.
Dr. Lalrokima Chankual, Head Faculty, Disaster Management Centre, ATI chuan ‘Vulnerability of Mizoram to various Hazards’ tih leh ‘Role of Media in Disaster Management’ tih thupui hmangin zirtirna a pe a. Zawhna leh sawihona hun hman a ni bawk.
Chhiatrupna a thlen thulha chhawmdawlna atana Department lamin hmanrua a neih disaster equipment te chu journalist te hun remchangah hmuh tir ni thei se tih te, chhiatna lian tham a thlenin report leh thu thehdarh a rintlak zawk theih nan thupuangtu bik spokesperson sawrkar in dah se tih te, insakna atana hmunhma him leh him lo video mapping pawh chiang zawka zir nise tih te training ah hian sawilan a ni.
