Nizan dar 8:00 pm khan Lawngtlai District Election Officer, 38-Lawngtlai East Assembly Returning Officer ni bawk Pu J. Hmingthanmawia chuan Election Commission of India in thuneihna a pek angin 38-Lawngtlai East huam chhunga Polling Station Number 30-Tialdawngilung a inthlan thatna tur hriattirna a ti chhuak.

Hriattirna chhuahin a tarlan danin Tialdawngilung Polling Station a inthlan thatna vote thlak hi naktuk ni 11.12.2013 (Nilaini) zing dar 7:00 AM atanga chawhnu lam dar 4:00 pm thleng neih tur a ni a, vote tlate hi naktip ni 12.12.2013 (Ningani) zing dar 8:00 am atanga chhiar nghal tur a ni bawk.

Hetiang a lo nih takah chuan Representation of the People Act, 1951 Section 58 na tlawh chhanin Election Commission of India chuan Mizoram Chief Electoral Officer hnenah lehkha No. H. 11018/7/2013-CEO thawnin Dt 25.11.2013 a Tialdawngilung a vote thlak tawh zawng zawng chu chhiarloh tur a nih thu a tarlang nghal bawk.

Tarlan tawh angin 38 Lawngtlai East A/C ah hian Polling Station 34 a awm a, heng zinga Polling Station 33 a vote tla te hi chhiar theih niin chhiar theih chinah hian INC Candidate Pu H. Zothangliana chuan vote 83 in hma a hruaia, Polling Station pakhat Tialdawngilung a vote thlakna khawl chu chhiar theih a nih ve tak loh avang leh he Polling Station a vote tlate hi vote 210 lai ni a record a nih bawk si avangin inlehthal theih a la ni bawk si a, Election Commission chuan hetiang hian ruahmanna a siam ta a ni.

Nizan vek khan Polling Party leh Polling Station a duty tur security lam te ruahmanna siam nghal an ni a, Polling Party ah hian heng mite hi tirh an ni:

Presiding Officer : R. Lalsawmliana, Lecturer, DIET

First Polling Officer : Lalmawizuala Renthlei

Second Polling Officer : Michael L H Mawia

Third Polling Officer : H. Lalmuanpuia

Security lam buaipui turin police 5 tirh an nih bakah Static Surveillance Team pakhat a kal tel nghal bawk.

Hei bakah hian District Election Office atangin Pu Vanlaltanpuia, MCS, Master Trainer ni bawk chuan he inthlan thatna hi a hmunah a thut chil nghal dawn bawk a ni.

Heng Polling Party te hian vawiin zing dar 10:30 khan Lawngtlai District Additional DC Pu R. Lalsangluaia chuan a vai liam a, Tialdawngilung hi an pan nghal a, he Polling Station hi Lawngtlai atanga khawchhak lam km 147 vela hla a awm niin, Phawngpui tlang chhimchhak lam Burma ram dep a awm a ni.