India ram zalenna ni champhaphak vawi 65-na chu vawiin chawhma dar 10:30 khan Tlabung Licheng Playground thar ah Pu S.Laldingliana, Parliamentary Secretary chu Khuallian niin an hmang. Independence day lawmna pual inkhawm buatsaih hi Pu John Tanpuia, SDO (C) in a kaihhruai a.

Pu S.Laldingliana hnam puan zar pawt pharh in Parade Contingent te chibai bukna a chhang let a ni. Parliamentary Secretary chuan India ramin zalenna nei tura kawng harsa leh chhukchho tak tak a zawh dante, Changkanna leh hmasawnna nei tura Remna leh Muanna awm a pawimawh zia a tar lan bakah Mizoram sawrkar-in Flagship Programme NLUP a kalpui dante,Kawlphetha khamkhawp tharchhuak tura tan alak nasat dante, Infiamna, hriselna, zirna bakah Ram dangte nena insumdawn tawnna kawnga ke a pen dan hrang hrangte chipchiar takin a tarlang bawk a ni. Pu Dinga chuan, "Pu Lalthanhawla kaihhruai sawrkar chuan inthlan dawna manifesto leh policy a tarlante tam tak a ti hlawhtling tawh a, a hlawhtling chho zel dawn bawk a ti.

Pu Dinga chuan "Kan rama Remna Leh Muanna kan neih hlut zia te, chumi avanga hmasawnna hrang hrang kan neih mek leh kan neih zel turte hria a, sawrkar hmalakna hrang hrangte hriatpui a, sawrkar tawiawm tur leh finchhuah zel turin in zavaiin ka sawm che u a ni," tiin kalkhawm mipuite a hrilh.

Parade contingent te lawmman hi Pu Dinga nupui Pi Lilypari Sailo chuan a hlan bawk.

Hemi hnu hian Pu Laldingliana hian Tlabung Civil leh Leprosy Hospital a damlo te hnenah Independence Day pual thilpek a hlan bakah Tuichawng khua a BCM Missionary pahnih Nl. Lalbiakmuani leh Nl. Mathani te hnenah independence Day pual thilpek atan Rs. 2000/- ve ve a hlan bawk