Ram chhung hmun dangte rualin, India Independence Day vawi 71-na chu vawiin khan Tlabungah pawh Mizoram Legislative Assembly Speaker Pu Hiphei-hoin ropui taka lawm a ni.

Vawiin chawhma dar 10-a Thangliana Muala India Hnam Puanzar a pawhpharh hnua parade contingent 10-te chibai bûk a chhanlet hnu-ah, Pu Hiphei chuan Independence Day hmang tura kalkhawm Tlabung mipuite chibai a bûk a, British awpna laka India a indan theihna tura zalenna sualtute inpekna ngaihlu thar turin Independence Day hmangtute a sawm a ni. Mizoram Legislative Assembly Speaker chuan, mahni-a ro a inrel hnu-ah India ramin kawng hrang hranga hma a sawn thu sawiin, India ram chu khawvela democracy ram ropui ber pawla a inhlankai tawh thu a sawi a, ei leh barah pawh India ramin nasa taka hma a sawn zel thu a sawi.

Tlabunga Independence Day khuallian Pu Hiphei chuan, Mizoram sawrkar hmalakna lian ber NLUP hmangin mi tam takin eizawnna ngelnghet an nei tawh thu sawiin NLUP vanga Mizoramin hmunphiah a hralhchhuah zat nasa taka a pun bakah, maimaw pangang khawiah pawh Mizoram a intodelh tawh a ni, a ti bawk. India ram hmasawnna chu za zela 7.6-a teh a nih laiin, NLUP vanga Mizoram hmasawnna chu za zelah 9.18 a kai chho tih kalkhawmte a hrilh.

Pu Hiphei chuan, British-in India ram an awp lai atang tawhin Tlabung chu khaw pawimawh tak a nih thu leh, Mizorama khaw hriathlawh berte zinga mi a nih thu a sawi a, Tlabunga chhungkaw  944-te chu NLUP thawh thumna leh thawh lina hnuaiah tanpuina pek an nih tawh thu a sawi. Mizoram UT a nih laia sak Tlabung damdawi ina OPD building chu cheng nuai 24 senga sak thar a nih tur thu leh, a building dang pawh NEDP hnuaia sak that tum mek a nih thu, vawiina Tlabunga Independence Day hmanpuitu Pu Hiphei chuan a sawi a, Tlabunga Sawrkar department hrang hrang tihchangtlun tuma Sawrkar-in hma a lak mek dan sawiin, khaw kar inkalpawhna kawng sial that tuma hma hma lak mek a nih dan te, mipuiten tui an hnianghnar zawk theihna tura Sawrkar-in hma lak mek dan te a sawi bawk.

Mizoram Assembly Speaker chuan, Tlabung chu tuilian vanga chhiatna nasa tak thlenna hmun a ni tih sawiin, tuilian tuartute a thinlunga a tawrhpui thu a sawi a, Sawrkar-in chhiatna tuartute chhawmdawl tuma theihtawp a chhuah mek thu a sawi bawk.

Tlabunga Thangliana Muala Independence Day lawmna hun hman zawh a nih hnu hian, Tlabung Sub-Divisional Hospital leh Leprosy Hospital-te chu khuallian Pu Hiphei hian tlawhin thilpek a hlàn a, Tlabung damdawi in dinhmun leh mamawh chi hrang hrang an neih te chu thawktuten Independence Day khuallian hnenah hian an lo thlen a ni.

Vawiina Tlabunga Independence Day lawmnaah hian, Mizoram Assembly Speaker Pu Hiphei hi 35 West Tuipui Constituency bialtu MLA Pu Nihar Kanti Chakma-in a tawiawm a ni.