No.2923/2021-2022
Aizawl 9th November 2021: Tlabung khaw din champha kum 150-na lawmna program chu Tlangliana Mual, Tlabungah vawiin khan neih chhunzawm niin RD, I&PR leh Revenue Department-te changtu Minister Pu Lalruatkima chuan khuallian niin lawmna program a hmanpui. Minister hian Tlabung Bazar Bungkawna Kum 150-na Lungphun a hawng nghal a ni.

Vawiin program-ah hian Lunglei HPC Vice Chairman Pu Lawmawma Tochhawng chu Khualzahawm niin Bialtu MLA Pu Nihar Kanti Chakma chu Khual Thlengtu a ni a. Program-ah hian official-te, Tlabung leh a chhehvel khua mi te leh Tlabung khaw chhuak Mizoram hmun hrang hrang atangin kalkhawmin lawmna program ropui tak hman a ni.

Minister Pu Lalruatkima chuan Mizoram history-a hmun pawimawh tak luahtu, Mizoram kawtchhuah hmasa leh chanchin tha hrilna hmun pawimawh hmasa Tlabung kum 150 tlin chu lawmawm a tih thu sawiin kalkhawmte chu Tlabung Sesquicentennial Celebration chibai a buk a. Kum 150 tlin lawmna chu rahbi thar thlentu leh kawng hrang hranga hmasawnna thlentu a nih ngei a beisei thu sawiin hmasawnna tlo leh daih rei nei turin Tlabung mipuite, a bik takin thalaite chu zirna, eizawnna, hnathawhna lamah tan la turin a chah a. Hun lo kal zel turah Mizoram leh sawrkar laipui recruitment-ah te leh sumdawnna leh entrepreneurship lamah te Tlabung thalaite chu a sulsutu leh hmahruaitu ni thei tura tan la turin a chah a ni.

Khawvel changkang chho zelah leilung hausakna, thing leh mau te kan ti chereu nasa hle a, chuvangin ram kan tih chhiat leh hemi avanga boruak, sik leh sa danglam nasa lutuk veng leh siamtha leh turin theihtawp a tan kan lak a tul a ni tiin khawtlang hruaitu, tlawmngawi pawlte leh mipuite chu hemi lama hian tan la theuh turih a chah a. Tlabung leh a chhehvel ti hmasawn turin sawrkarin theihtawp a chhuah mek zel a ni tiin mipuite chu sawrkar hmalaknate lo tawiawm zel tur leh lo finchhuah thin turin a sawm a ni.

He huna khualzahawm Lunglei HPC Vice Chairman Pu Lawmawma Tochhawng chuan Mizoram tana khaw pawimawh leh kan State ro hlu tam tak awmna Tlabung khua in Pathian hruaina leh venhimna zarah kum 150 tlin lawmna hun an hmang thei chu lawmawm a tih thu a sawi a. Tlabung chu khaw upa tawh anih angin a cheng mipuite pawhin rilru puitling tak an put a tul a ni tiin mipuite chu intodelh tum tlat tur leh border trade kalpui hunah pawh mahni kutkawiha thil siam leh tharchhuahte hralh thei tura tun atanga lo inpuahchaha tan la turin a chah a ni.

Vawiin program ah hian Tlabung leh a chhehvela cheng hnam hrang hrang ten an hnam lam te entirin program ropui leh hlimawm tak hman a ni a. Tlabung kum 150- na puala hla inphuahsiak ah 'Bung khawpui runah' tih hla ziaktu Pu Laldinngheta chuan pakhatna lawmman dawngin logo insiamsiakna ah Pu Lalhmangaihtluanga chuan lawmman a dawng a ni. Veng fai lawmman semna hun pawh vawiin program ah hian hman a ni.

Mizo lalte kut atanga Mary Winchester (Zoluti) la let leh tura British sawrkarin a rawn tirh Thangliana (Lt Col TH Lewin) chuan Khawthlangtuipui Lawnglenga rawn chhovin, 9th November, 1871 khan Tlabung khua hi alo din ta a ni.