Champhai Tlangsam khua chuan kum 1910 atanga meimit lova an awmna Centenary chu ropui takin an lawm. He Centenary lawmna ni 4(9th- 12th) awh tur hi Pu J.H. Rothuama, Minister, Cooperation leh Land Rev. & Settlement chuan khuallian niin a hmanpui a, Centenary Lungphun Sericulture Farm kianga siam chu tukin dar 7:30 khan a hawng.

Centenary lawmna vantlang inkhawm vawiin dar 10:30 atanga tanin Community Hall a hman a ni a. He inkhawm hi Khuallian Pu J.H. Rothuama bakah Champhai North Bialtu Pu TT. Zothansanga te leh mi pawimawh tak takin an hmanpui a ni. Vantlang inkhawm ah hian Khuallian chuan thusawiin hun rei tawh tak atanga Centenary inbuatsaihna harsatna awm lova kan thleng thei chu lawmawm a ni a ti a, Tlangsam khua chuan khaw satliah ah kan in ngai ang tih ka hlau a, he khua atang hian kan ram rorelna sangberah pawh thu pha an chhuak a, sakhuana lamah pawh Pastor engemawzat an awm bawka ni tiin Tlangsam Lal chu Mizoram ah pawh hriat hlawh pawl tak a ni a ti bawk.

Vawiin vantlang inkhawm ah hian Pu TT. Zothansanga,MLA, Pu C.Chawngkunga, Ex-Minister, Pu J.C. Chawngvawra, Chairman, MCAB leh mi pawimawh tak tak dang ten thu an sawi a, Centenary Zaipawl, mimal zai leh TNT Band te hnen atangin zai leh rimawi ngaihnawm tak tak ngaihthlak tura awm reng a. Kum 80 chin chunglam te hnenah chawimawina certificate an hlan a. Tlai ah a khaw nawta theh tur ruai buatsaih a ni.