No.1115/2021-2022

Aizawl the 24th June, 2021: 2020 Summer Olympics, kumin a khelh tura India aiaawha Hockey Squad-a tel tura thlan Lalremsiami chu amah lawmpuina leh chawimawina hun vawiin khan Chief Minister Pu Zoramthanga hovin CM Conference Hall-ah hman a ni a. A hlawhtlinnaa lawmpui nan leh a kal zelna tura duhsakna lantir nan Mizoram sawrkarin cheng nuai sawmhnih panga a pek turah vawiin hian amah aiawhtu, a coach hlui Pi Lalrampari hnenah Cheng nuai sawm hlan a ni. Olympics zawhah a bak zawng hi amah Lalremsiami kuta hlan leh tura ruahman a ni.

Chief Minister Pu Zoramthanga chuan inelna level sang tak paltlangtu Lalremsiami chu Mizo nula zinga chhuanawm berte zing ami a ni tiin, a thawhrimna leh inpekna te chu a entawntlak thu leh chawimawi a phu thu a sawi a; Olympic games atan duhsakna a hlan. Chief Minister chuan hockey chu Mizo ten infiamna khawvelah 'advantage' kan neihna a ni, a ti a. Tun hma atang tawhin Mizoram chuan Hockey player tha tak tak neiin, tunah hian he infiamna hi chawisang zel turin sawrkar pawhin hma a lak thu a sawi. Hockey India nena inrawnna angin hockey than lenna tur atan special committee siam a nih tur thu a sawi. Chief Minister chuan hockey bakah sports discipline hrang hrang hmanga eizawnna tha tak tak nei Mizote zingah an awm belh chho zel chu lawmawm tiin, thalaite eizawnna kawng tha tak pakhat a nih chhoh zel theih nan sorts industry changtlung tak siam tura ruahmanna siam a nih zel thu a sawi bawk.

He hunah hian Kolasib bialtu MLA, FCS&CA Minister Pu K. Lalrinliana pawh telin, Mizoram leh a bik takin Kolasib district tan Lalremsiami chu a chhuanawm thu a sawi a. Hockey lama hlawhtlinna hrang hrang a lo hmuh tawhte sawiin, vawiin amah chawimawina huna ama aiawha tel tura beisei a chhungte chu hrileng avanga an lo kal theilo chu pawi a tih thu a sawi bawk. Lalremsiami tan hian sawrkarin in hmun pek a tiam thu leh, tihfel thuai a nih tur thu a sawi a. Minister Pu K. Lalrinliana chuan Kolasib district chu hockey leh infiamna khawvelah Mizoram tan hmunpui pakhat a nih chhoh zel thu sawiin, tunah hian Khelo India Centre of Excellence pahnih - hockey atan Kawnpui leh football tan Kolasib Saidan football ground te chu siam a nih thu a sawi.

Sport & Youth Services Minister Pu Robert Romawia Royte chuan India state tam takin an mi leh sa Olympics a tel thei an neihloh laia Mizoramin Lalremsiami kan nei chu lawmawm a tih thu a sawi a. State sawrkar chuan Olympics a tel thei infiammi kan neih theih nan theihtawp lo chhuah tawh thin thu leh incentive te pek a nih dan a sawi a. Tun tuma sawrkarin cheng nuai sawm a pek bakah cheng nuai sawm panga dang chu amah Lalremsiami ngei telin Olympic Games zawh pek leh a nih tur bakah, Olympics a medal a dawn chuan state in lawmpuina dang pawh a ngaihtuah belh sak zel tur thu a sawi. Sports Minister chuan Hockey chawilar a, thalai tam zawkte tan eizawnna siam nan sawrkarin hmasawnna ruhrel mamawh angte a buaipui zel thu sawiin, Muallungthu ah Khelo India atanga sum hmuh (cheng nuai 550) hmangin astro turf hockey ground siam mek a nih thu leh, Lunglei Salem venga hockey ground siamna tur sanction cheng nuai 1108.70 pawh hmuh a nih tawh thu a sawi bawk.

Vawiin programme hi Commissioner & Secretary, SYS Department Pu H. Lalengmawia chuan kaihruaiin, Director Pu Lalsangliana chuan lawmthu sawiin hun a khar a. Tlawmngai pawl hrang hrang leh Mizoram Olympic Association, USAM leh Hockey Mizoram aiawh theuh te an tel bawk.

2020 Summer Olympics hi Tokyo ah kumin July ni 23 atanga August ni 8 chhung neih tura ruahman a ni. Lalremsiami hi Mizoram atanga Olympic Games a tel thei hmeichhe awmchhun a ni.