Central sawrkar office leh undertaking hrang hranga Hindi hman uarna lam hnathawktu Town Official Language Implementation Committee (TOLIC) chuan vawiin khan Aizawl-a State Guest House Conference Hall-ah Biennial Meeting an nei.
Aizawl leh a chhehvela Central sawrkar office, undertaking leh bank hrang hrang hotuten an hnathawkte uar zawka Hindi zirtir leh hman uar tir dan tur kawngte an sawi ho a. September ni 14-a Hindi Divas hman ho dan turte leh Central office hrang hranga Hindi Fortnight hman dan turte an sawiho bawk. Official Language hman dan quarterly report buatsaih chungchangah workshop buatsaih nise an ti a. He workshop atan hian Delhi lam mithiamte chah nise an ti.

Vawiina TOLIC meeting-ah hian Aizawl leh a chhehvela Central sawrkar office leh bank hrang hrang 50 vel aiawhte an kal a. Midangte bakah Pu J. Thatlinga, Chairman, Mizoram Rural Bank, Dr. Thanpuii, Director, RIPANS leh Pu C. Lalhmachhuana, DGM, BSNL te an tel a. Sawrkar bank leh corporation-te pawh tiamin heng office zawng zawngte hi Official Language Act danin a phut angin an staff-te Hindi zir thiam tir vek tur leh hman uartir tura tih an ni a. Official Language Deptt, Ministry of Home Affairs, Govt. of India in Official Language Resolution 1968 zulzuia kum tina hman tur Annual Programme a duan thinte tihlawhtling turin TOLIC member office tinte an in hriattir a ni.

Vawiina TOLIC biennial meeting neihah hian Central sawrkar office aiawhte an kal tha hle a. TOLIC Chairman Pu C. Lalrosanga, Director, DDK Aizawl leh DDG, AIR, NER(II) in a ho a ni. TOLIC meeting chuan Mizoram-a Hindi zirtirna leh Hindi zirtirtute hnena training pek dante pawh sawihoin tun aia tha zawka siam tul an ti a. Workshop-te leh Refresher’s course-te tha zawka buatsaih nise an duh thu an sawi.