No.953/2021-2022

Dated Serchhip, the 13th June, 2021: Mizoram Sawrkar, Disaster Management & Rehabilitation Department Order No.B.13021/101/2020-DMR/Vol-IV dt.12.06.2021-in Mizoram puma hman tur inkhuahkhirhna Clause A-in a sawi chu a hnuaia tarlan bikte nen hian Serchhip District pumah hman nghal tur a ni.

He Sawrkar Order-in Deputy Commissioner/DDMA-te thuneihna min pek angin COVID-19 hrilêng hluar zêl tur laka mipuite kan him nan a hnuaia inkaihhruaina thupekte hi ni 14.06.2021 zîng dâr 4:00 AM atanga ni 21.06.2021 zîng dâr 4:00 AM thleng chu Serchhip District chhûngah thahnemngai taka zawm vek tur a ni. 

A. SERCHHIP DISTRICT PUMA HMAN TUR 

I. Mipui vantlang tana inkhuahkhirhna:

1) Hemi hun chhung hian eizawnna leh tûl bik thil ni lova veivah leh inlênpawh khap tlat a ni. Colony/building leh thler khata awmte pawh inlenpawh loh tur a ni. 

2) Tûl bik thila pâwna chhuak tur reng reng chuan face mask emaw hmanraw dangin emaw hmai an tuam ngei tur a ni. 

3) Vântlâng hmuna kalte chu feet 6 tala inhlata awm tur a ni. 

4) Dawr leh bazar hawn chungchangah vawi khata mipui tam tak pungkhawm tur ven nan VLTF-ten ruahmanna an siam ang. 

5) Eizawnna leh hmasawnna hnathawh chungchangah COVID-19 laka himna tura Sawrkarin inkaihhruaina a siamte chu uluk taka zawm chung zela kalpui tur a ni. 

6) COVID-19 hri laka kan himna tur hian mi tin hian tih tur pawimawh tak kan nei theuh va, chung tih tur leh zawm tur Covid Appropriate Behaviour (CAB)te chu Annexure-I & II-ah tarlan a ni a, mi tinin zawm theuh tur a ni. 

II. Zin veivah chungchang:

1) Mahni chenna khua chhuahsana zin veivah khap tlat a ni. Amaherawhchu, loh theih loh thil, chhiat tawh leh damlohna thila mahni khua chhuahsan a tûl a nih chuan mahni veng emaw khua emaw VLTF-te hriatpuina lehkha nen zin theih a ni ang. VLTF-te hriatpuina lehkhaah hian zin tanna hmun (origin)leh zinna tur (destination), zinna chhan, zin zât mihring hming, zin ni leh darkar a chuang ngei tur a ni. 

2) Heng bakah loh theih loh thila zin tulnaah chuan zin turten anmahni awmna veng/khua VLTF-te hriatpuina lehkha lâin Deputy Commissioner/SDO (Civil)/BDO-ten phalna an pe thei ang. Dilna hi mcovid.mizoram.gov.in/pages/mpass/inter-district-ah emaw mCOVID-19 app-ah emaw dil theih a ni. 

3) He inkhuahkirhna hian College/University zirlaite online exam tura internet connection that zawkna khua/hmun pan ngaite a huam lo ang. Amaherawhchu, heng zirlaite hian College/University ID card leh Exam Admit Card Police/Executive duty/VLTF endik tur an nei ngei tur a ni.

III. Zirna in, sakhaw biakna leh mipui punkhawmna hmunte:

1) Public park, picnic spot, gym, infiamna hmun, community hall, restaurant leh shopping complex bakah phalna pek ni lo dawrte leh intâwllênna hmun zawng zawng chu khar chhunzawm tur a ni. 

2) Chhungkua/mimal eizawnna kaihhnawih ni lo, a huhova lui kal, ramhnuaia picnic, hiking leh adventure sports te khap a ni. 

3) Zirna in-te chu khâr tur a ni a, Board Exam, All India level exam, recruitment exam leh a dangte chu SOP khauh taka kengkawh chungin phalna hranpa pekte chauh kalpui theih a ni ang. 

4) Sakhaw biakna hmunte khar chhunzawm tur a ni. 

5) Inneihna leh reception-ah mi 30 (sawmthum) aia tam pun khawm phal a ni lo. 

6) Mitthi vuinaah mi 30 (sawmthum) aia tam punkhawm phal a ni lo. 

7) Chhiatni-thatni leh puipunna dang reng rengah ei leh in sem/siam phal a ni lo. 

8) Mipui punkhawmna heng – birthday leh anniversary lawmna, games and sports, book release, lungphun leh intihhlimna ang chi reng rengte chu inkhuahkhirhna hman hun chhung hian huaihawt phal a ni lo. 

IV. Bungraw lakluh phurtute chungchang:

1) State pawn atanga bungraw lakluh phurtute (driver leh handyman) mCOVID-19-ah an in register ang. 

2) Bungraw phurtu screening paltlanga Serchhip district chhunga lo lûtte chu khaw chhungah mi dang nen inchiahpiah lovin an bungrua an hlàn thlâk (unload) zawh veleh an lêt leh nghal ang. An bungaw hlàn thlâk (unload)chhung hian feet 6 tala mi dang hlatin an awm tur a ni. 

3) Bungraw hlàn thlâk (unload) hi zan dar 8:00 PM leh zing dar 4:00 AM inkarah tih tur a ni.

4) Serchhip District chhungah Mizoram-a bungraw awm sa emaw siam chhuah/tharte thiar emaw chungchangah inkhuahkhirhna a awm lovang. Amaherawhchu, District pawnlama bungraw phur turte chuan anmahni awmna veng/khua VLTF-te hriatpuina lehkha lain Deputy Commissioner/SDO (Civil)/BDO-ten phalna an pe thei ang. Dilna hi mcovid.mizoram.gov.in/pages/mpass/inter-district-ah emaw mCOVID-19 app-ah emaw dil theih a ni. 

5) Public Distribution System (PDS) hnuaia ration dawr/retailer-a pek chhuah tur buhfai, chini leh khawvartui phur motor-te chu FCS&CA Department-in Delivery Order/Despatch Challan a pek chhuah, la nung mek an ken chuan phalna hranpa ngai lovin Mizoram chhungah bungrua an thiar thei ang. 

6) State pawn atanga bungraw lakluh phurtute (driver leh handyman) chu backload lâk tur zawngin Serchhip District chhungah tawi khawmuan leh veivah phal a ni lo. Ei leh in an siam dawn a nih pawhin khaw dai/pawnah, mi dang chiahpiah phak lohvin ruahmanna an siam tur a ni. 

V. Veng leh khaw bil inkhuahkhirhna:

He order/inkaihhruaina thupekin a huam baka vêng bil emaw khaw bil emaw tana inkhuahkhirhna khauh zawk neih a tul a nih chuan, a chhan leh vang chiang taka ziakin VLTF-ten Serchhip town area bikah chuan Deputy Commissioner hnenah rawtna an siam thei ang. Serchhip RD Block huam chhung, Serchhip town area pawnah chuan BDO, Serchhip hnenah rawtna an siam thei ang. Chutiang bawkin, Thênzâwl leh North Vanlaiphai Civil Sub-Division area-ah te chuan mahni area Sub-Divisional Officer (Civil)-te hnenah rawtna an thlen thei ang.

VLTF-ten Deputy Commissioner/DDMA order No.13018/1/2021-DC(SRCP) dt.11.06.21 chu veng leh khaw bil inkhuahkhirhna chungchangah an zawm tlat tur a ni a. Inkhuahkhirhna hranpain curfew/lockdown/containment area/restricted area puan loh tur a ni. Containment area/restricted area puan ngai a awm a nih chuan State Government ruahmanna dinglai angin a tul angin District Magistrate-in a puang ang. 

B. SERCHHIP DISTRICT HEADQUARTERS BIKA HMAN TUR: 

I. Mipui vantlang tana inkhuahkhirhna hriat turte:

1) Tumahin mahni in/compound an chhuahsan tur a ni lo va, building khata in hrang hrang luahte leh thler khata chengte pawh intlawhpawh loh tur a ni. VLTF leh Executive duty-ten an huam chhungah inlenpawh an awm loh nan an huam chhung fangin khauh takin hma an la ang. 

2) Tul bik thil avanga chhuah ngai – damdawi lei tur, ni tin mamawh lei tur leh doctor hnena inentir turte chuan an awmna VLTF-te phalna ziaka la hmasain, VLTF-ten ruahmanna an siam angin an chhuak thei ang, An tih tur an tih zawhah hàw lehnghal tur a ni. 

3) Lirthei hmanga veivah khap tlat a ni a. Mahse hei hian point V-a inkhuahkhirhnain a huam loh tarlante chu a huam lo ang. 

4) Zan dar 7:00 PM atanga zing dar 4:00 AM chhung curfew a ni. 

II. Sawrkar office leh a kaihhnawih:

Mizoram Sawrkar Order Clause A.7 (2)-in a tarlan angin District Headquarters-ah pawh Sawrkar hnathawkte, Chairman, DDMA / Deputy Commissioner, Serchhip-in Covid-19 Executive Duty tana a ruat tih lohte chu Covid Appropriate Behaviour (CAB) tha taka zawm chunga Sawrkar Office kal tur a ni. 

III. Dâwr leh hnathawhna hmun chungchang:

1) Eichawp dawrte chu ni tin zing dar 5:00 am atanga zing dar 8:00 am thleng VLTF-te ruahmannain a hawn theih ang a, zing dar 8:00 pm hnu lamah chuan dawrte hi hawn phal a ni lo. Heng dawr/thil zawrhna hmuna zawrh tur bungruate hi VLTF hriatpuinain eichawp dawr hawn rual hian retailer-tendistributor/wholesaler hnen atangin an lam khawm thei ang. 

2) Thlai/chawhmeh leh thlai chi/tiak leh agriculture leh horticulture kaihhnawih bungraw zawrhnate chu ni tin zing dar 05:00 am aṭanga tlai dar 05:00 pm thleng hawn theih an ni ang. Sa zawrh chungchangah VLTF tinten an vengchhung mamawhna ang zelin ruahmanna an siam ang. 

3) Heng a hnuaia dâwr tarlante hi zing dar 05:00 am atanga tlai dar 05:00 pm thleng hetiang hian hawn theih a ni ang. Heng dawr pan turte hian anmahni VLTF-te phalna (movement permit) an la hmasa tur a ni. 

1 Zirlaibu zawrhna dawr Thawhlehni leh Zirtawpni 

2 Bungraw phur motor mamawh, oil leh spare parts zawrhna leh loh theih loh thila hawn ngai hetiang motor siamna bîk workshop/puncture works Thawhlehni leh Zirtawpni. Hemi bakah hian emergency thila motor kaihhnawih tul vanga inhawn a ngai a nih chuan VLTF-ten ruahmanna an siam ang.

3 Computer leh mobile zawrhna leh siamna (repairing centre) dawr. Thawhtanni leh  Nilaithawhtan 

4 Hmasâwnna hna pêng hrang hrang thawhna atana bungraw mamawh - iron rod, balu, rawra, lung, brick, cement, electric bungrua, insakna bungrua ilo zawrhna te. Thawhtanni leh Nilaini 

5 Heng a chunga sawi ni lo dawr dang hawn ngai a awm a nih chuan VLTF-ten anmahni vêng chhung theuhah kar khata vawi hnih hawn theih turin ruahmanna an siam thei ang. 

4) Veng danga chawhmeh ilo lei tura kal a ngaih loh nan VLTF tinten anmahni veng chhungah chawhmeh zawrhna tur ruahmanna an siam ang.

5) VLTF-ten thlai/chawhmeh zuarte ṭhutna tur hmun fel takin an ruahman ang a. Bazar kalte thâwl tak leh midang nena inhnaih lova an bazar theih nan thlai/chawhmeh zuartute ṭhutna inkarah feet 6 tal hmun âwl an zuah zel tur a ni.

6) A ṭul dan azirin veng chhunga vantlang hmun âwl zau ṭha/kawngpui/school compound te pawh thlai/chawhmeh bazar atan an hmang thei ang.

7) Thlai/chawhmeh bazar leh dawrte hi tlai dar 5:00-ah khar ngei ngei tur a ni. Tlai dar 5:00 pm pelh hnuah tumah bazar kal tura chhuahvah phal a ni lo.

8) District Headquarters pawn lam khaw hrang hranga dawrkaiten dawr bungraw hrang hrang Serchhip khawpui chhungah Nilaini leh Nilaithawhtanah an lam khawm thei ang. Bungraw lak khawm dan tur hi Serchhip khawpui chhunga dawr awmna veng VLTF-te leh khaw pawn atanga bungraw la tura lo kal te khua VLTF-te nena inbiain ruahmanna siam theih a ni ang.

 IV. Hmasawnna hnathawh chungchang

1) District headquarters-ah chuan mahni in/compound chhunga hnathawktu leh hmanraw awm sate hmangin hnathawh phal a ni a. Veng dang atanga hnathawktu rawih a ngai a nih chuan hna neituin mahni awmna veng/khua VLTF-te hnenah thlenin, VLTF-ten hnathawktu tur awmna veng/khua VLTF-te nena inberawnin ruahhmanna an siam thei ang. 

2) District Headquarters ami hmasawnna hnathawh hrang hrang, quarry-a lung lak, kawng laih, lei dawh, tui lak, adt. chu khuahkhirhna awm lovin kalpui  theih a ni ang. Amaherawhchu khawpui leh an hnathawhna hmun inkara veivah chhen phal a ni lo. 

3) District Headquarters chhungah hmasawnna hnathawh hrang hrang, chhiatna thleng thei laka invenna atana thawh tûl zual a awm a nih chuan a hmunah VLTF-ten enchiang (verify) hmasain, Deputy Commissioner emaw a aiawh emaw te nen ruahmanna an siam thei ang. 

4) District headquarters-a cheng/khawsa, lo leh huan neitu te, ran vulhtu te, sangha dil neitu te leh a thawktu te chu phalna hranpa lak ngai lovin an hna thawh phalsak an ni a, lo/huana hna thawk tura ram riah pawh phal a ni. Hmun khata mi 5 (panga) aia tam awmkhawm erawh chu khap a ni. Lo/huana kal/feh turte chuan zing dar 9:00 hmain khaw chhung an chhuahsan hman tur a ni a, tlai dar 4:00 hma a khaw chhung an luh phal a ni lo.

Amaherawhchu, nilenga hnathawh ngai lote tan chhun dar 12:00 leh chawhnu dar 1:00 inkarah khaw chhungah haw phal a ni. Tin, huan/loa feh turte reng reng chuan police/COVID-19 Executive Duty/VLTF-te check theih turin anmahni veng/khua VLTF-te hriatpuina lehkha an keng ngei tur a ni.

5) Mahni ina thil siamna (home based industry) - carpentry workshop, steel fabrication workshop, bakery, puan thuina, puan tahna leh hetiang lam thil thawhna hmunahte chuan a awm chilhtu, hnathawktute tan VLTF hriatpuinain hnathawh phal a ni a. Amaherawhchu, mahni in atanga veng danga hnathawhna hmun pan ngai a nih chuan hnathawhna hmun hrang hrang sawi lan takte chu a neituin VLTF-te biain VLTF-te ruahmanna angin hna thawh theih a ni ang. 

 V. Inkhuahkhirhnain a huam lohte:

1) Places/Vehicles (hmun/lirthei):

(i) Hospital, nursing home, clinic, laboratory, OST Centre, OSC, ART Centre, blood bank leh damdawi dawr. 

(ii) Veterinary hospital, dispensary, clinic, zoo leh hatchery. 

(iii) Bank, non-banking financial institutions, insurance, ATM leh post office. 

(iv) Petrol/diesel filling station leh LPG storehouse. 

(v) Fair price shop/ration dawr leh FCS&CA Department/FCI hnuaia godown te. 

(vi) Covid-19 duty-te hman taxi leh rental motor. 

(vii) Feed mill/ran chaw zawrhna dawr leh AH&VETY slaughter house. 

Note: Heng hmun pan turte (thawktu ni lo, dawrtu) hian anmahni veng VLTF atangin veivah phalna (movement permit) an la tur a ni.

2) Services (Hna):

(i) Covid-19 vaccination leh immunization programme dangte, ambulance driver. 

(ii) Animal disease control programme. 

(iii) Postal service, blood donation camp/service, child and women helpline service. 

(iv) Kohhran hna tul zual thawk tura Kohhran office kal leh kohhran hotute programme pawimawh bik. 

(v) Nau pai, nausen pawm lai leh naupangte hnena nutrition (chaw tha) sem bakah nutrition sem tur godown atanga phurh chhuah leh sem darh. 

(vi) Bawnghnute sem leh lak khawm. 

(vii) Power & electricity, water supply (mimal tui chawite huamin), sanitation leh solid waste management (hmunphiat leh bawlhhlawh paihte huamin), telecommunication, internet service, broadcasting leh cable service. 

(viii) Print leh electronic media leh chanchinbu sem. 

(ix) Bungraw load leh unload hna (8:00 PM leh 4:00 AM inkarah). 

(x) Private security service. 

(xi) Medical emergency leh chhiahtawh thila awmna veng VLTF-te hriatpuina lehkha nena chhuah. 

(xii) LPG delivery service. 

(xiii) Courier service, e-commerce leh home delivery. Heng hian State pawn leh State chhunga dawrkaite leh sumdawngte bungrua, State chhunga thiar/siam chhuah tiamin, online emaw phone hmang emawa order lawk sate pêk (home delivery) leh e-commerce/home delivery kaihhnawih hna ṭul thawk tura an inhawn a huam a ni. Tin, bungraw dahtu (delivery person) chuan Covid Appropriate Behaviour (CAB) tha taka zawm chungin mi inchhûnga lût lovin an thil semte chu an pe tur a ni. 

(xiv) COVID-19 kaihhnawiha duty-te.

C. District Headquarters pawn lamah chuan Sub-Divisional Officer (Civil)-te kaihhruaina hnuaiah Sawrkar aiawhte leh VLTF-ten an dinhmun uluk taka zir chiangin he Order-a Clause B zulzuiin inkaihhruaina siamin an kalpui ang.  Serchhip town area pawn lam, Serchhip RD Block huam chhung khuate kal dan tur chu Clause B zulzuiin Block Development Officer, Serchhip-in a tul angin ruahmanna a siam ang. 

Heng inkhuahkhirna thupêkte hi khauh taka kengkawh turin COVID-19 Zonal Officers, Police Duty, Executive Duty Team-te leh VLTF-te kan inhriattir a ni. 

 Dan zawm lote chu Disaster Management Act, 2001 Section 51 atanga 60, the Mizoram (Containment & Prevention of the spread of COVID-19) Act, 2020 leh IPC Section 188 hmanga hrem theih an ni.