No.7671/2020-2021

Vawiin khan khan Pi Esther Lal Ruatkimi,  Commissioner & Secretary, Tourism Department chuan Tourist Lodge, Chaltlangah “Training for Tour Guides in Mizoram” a hawng a. He Training pawimawh tak, thlakhat chhung awh tur Tourism Department buatsaih hi Mizoramah buatsaih a nih vawikhatna a ni. 

He hunah hian Khuallian Pi Esther Lal Ruatkimi, Commissioner & Secretary, Tourism Department chuan Tour Guide hnathawh leh mawhphurhna te zirchiang tura Training chhimtute chu uluk taka zirtirna dawng turin a fuih a. Tun dinhmun ah hian certified tour guide Mizoram hian a la nei lo a, he programme hi hlawhtling taka zawh anih chuan mahni ke a ding thei tur khawp certified tour guide mi 100 chuang chher ngei Tourism Department chuan a tum a. License hi kum 3 daih tur a ni a, sawrkar dan angin a renew leh zel theih a ni tih a sawi a. Mizoramin Khualzinmite  tam zawk a hip theihna tura Tour Guide te pawimawhna te sawiin  he training hi Mizorama Tourism tih hmasawnna atana hmalakna pawimawh tak a nih thu pawh a sawi bawk a ni.

Covid-19 vangin thalai ram pawna ei zawnga hnathawk tam tak kum 2020 chhung khan an rawn haw a, a tam zawk chu tourism leh hospitality sector-a thawkte an ni. Eizawnna ngialnghet neilote leh an thawhna ngaia let theilo te tan Mizoram sawrkar chuan North Eastern Council (NEC) atanga funding hmu in chhawmdawlna scheme “Entrepreneurship and Skill Development for Returned Migrant Workers due to Covid – 19” chu Mizoram Youth Commission kaltlangin a kalpui  a. He scheme hnuaiah hian Tour Guide training pawh telin, mi 100 tan training pe turin ruahmanna siam a ni. Amaherawhchu returned migrants atangin training tur an inhmuhkhawp loh avangin Mizoram chhunga thalaite training duh tan pawh hawn a ni. He training atan hian hming pe lut mi 162 awmin, koh vek an ni a, training tura rawn kalte chu mi 121 an ni.

“Guidelines for Tour Guides in Mizoram” chu 28 August 2020 khan Tourism Department chuan a lo chhuah tawh a, he guidelines mil hian Course Syllabus chu duan niin, trainees te chuan theory leh practical bakah soft skills lama zirtirna an dawng dawn a. Resource persons atan hian Mizoram University leh Mizoram Christian College a zirtirtu, ATI leh Tourism Department officials bakah Mizorama Tourism industry a sulsutute leh a course atana thiamna bik neite hman an ni dawn a ni.

Training pangai chu Tourist Lodge, Chaltlangah  neih a ni dawn a.  Practical leh on-field training te chu  hmun hrang hrangah neih pui an ni dawn a ni. Trainees te chu Certified Tour Guide ni turin exam an pass a ngai dawn a, license an neih chuan sawrkarin rate a tuk angin kan rama rawn zin mikhualte chuan an ruaithei dawn a. He training pass chhuakte tan Felicitation Programme chu March 30, 2021-ah Tourism Minister, Pu Robert Romawia Royte in a hman pui tura ruahman a ni.