No.3997/2021-2022

Aizawl, the 15th February 2022: Azadi ka Amrit Mahotsav lawmna denchhenin Biker 75 tan  India Hmarchhak fan chhuahna hun – ‘North East on Wheels’ huaihawt a ni dawn a. He tour hi India hmarchhak chhunga chengte hriatchian leh zual na atana buatsaih a ni a. Hemi chungchangah hian a huaihawttu  Amazing Namaste Foundation hruaitute chuan Governor Hari Babu Kambhampati an hmu a. North East on Wheels’ tour neih chhunga Mizoram chhunga hun hman a nih dan tur leh state chhung hmun hrang hrang te tlawh kual a nih dan tur te an sawipui. He Tour a tel tur hian Mizo Biker te pawh an sawm nghal a ni. 

Governor Hari Babu Kambhampati chuan Azadi ka Amrit Mahotsav lawmna denchhen a North East on Wheels neih a ni tur leh Mizoram pawhin a lo thleng tur chu lawmawm a tih thu a sawi a. He tour pawimawh tak hian India Hmarchhak a chengte leh hmundanga chengte inkarah inhriatchian zawkna leh  inkungkaihna tha zawk a siam dawn a  ni a ti. Governor chuan Mizoram state mawi tak leh a chhunga micheng hawihawm tak te pawnlammi ten an rawn hmu thei tur chu thil lawmawm tak a ni a ti a. Mizoram chuan North East on Wheels a tel Biker te chu thinlung takin kan lo lawm a; Mizorama an cham chhungin hun hlimawm tak hmang turin duhsakna kan hlan lawk a ni a ti. 

Pu Atul Kulkarni, Member, Board of Governor, IIM Shillong & Chief Promoter, Amazing Namaste Foundation chuan Amrit Mahotsav lawmna denchhena buatsaih tur ‘North East on Wheels’ chu India ram hmundanga cheng ten India hmarchhaka cheng te nundan, khawsak phung, ei leh in, an hnam ziarang bakah India hmarchhak state chhunga hmun mawi tak tak la tlawh pawh tam loh lai te an hriatchian zawkna atana buatsaih tih a sawi a. He tour-ah hian India ram chhung hmun hrang hranga mi Biker te tel tura sawm an ni a. Biker 75 tel thei tura ruahmanna siam a ni a ti. ‘North East on Wheels’ tour hi ni 9 chhunga  neih tur a ni a. Hemi chhung hian Biker te hian Km 1400 chuang Bike a tlankualin India Hmarchhak state zawng zawng te an tlawh chhuak dawn a ni. 

He event hi India ram pum huap atan website atanga registration tih tur ani a.Registration titute atangin mi 75 hi thlanchhuah a ni ang. Mizoram atanga registration ti duh tan heng phone number-8794571126(Asawmi) leh 9436350058(Masangi ,Caratlane) ah te biak pawh theih an ni a. A zirchiang a hrechiang duh tan www.northeastonwheels.in en theih a ni e.