2863/2024-2025

Aizawl, the 6th November 2024: Nizan khan District-Wise Tour Itinerary Creation Competition chu a vawikhatna atan Ignite Studio, Khatla-ah Tourism Department in a buatsaih. He hunah hian Prof. Lalnilawma,  Rural Development Minister chu Khuallian a ni.

He huna Khuallian Prof. Lalnilawma, RD Minister chuan District-Wise Tour Itinerary Creation Competition buatsaih a ni thei chu lawmawm a tih thu a sawi a. Deputy Commissioner ten phur taka Tourism hmasawnna atana an district theuh a tourist destination an rawn pho chhuak hi hmasawnna pawimawh tak a ni tih a sawi. 

Prof Lalnilawma chuan he Tourism Minister Pi Lalrinpuii hmathlirna fing tak leh ruahmanna avanga hetiang intihsiakna hlawhthlak tak buatsaih a ni chu lawmawm a tih thu a sawi a. Mizoramin khualzinmite hiptheihna kan nei tha a, kan la haichhuah tur pawh tam tak a la awm ngei ang a ti bawk. 

Deputy Commissioner ten an District theuh a Tourist footfall a tam zawkna tura destination tha tur an rawn pho chhuah te chuan beng a tivarin mit a tihtlai bakah Khualzinmite hipna kawngah hmasawnna a thlen belh ngei dawn niin a sawi a. Mikhualte chunga that chhuah thin Mizote tluka Khualzinmite lo dawl thei tur an awm bik lo a ti a.  Kan tangrual anga Mimal tin te hi Mizoram Tourism Promotion atan Brand Ambassador nih kan tum phawt chuan nasa takin hma kan sawn ang a ti.

He competition ah hian Office of the Deputy Commissioner, Serchhip District chuan lawmman 1-na la in pawisa fai Rs.30,000/- an dawng a, 2-na chu Office of the Deputy Commissioner, Saitual District niin Rs.20,000/- an dawng a, lawmman 3-na chu Office of the Deputy Commissioner, Lunglei District niin Rs.10,000/- an dawng bawk a ni. District zawng zawng te hi Certificate pek an ni theuh bawk.

District wise Tour itinerary Creation Competition endiktute chu Pu Vanneihtluanga, Pi Maria CT Zuali leh Pu J. Vanlalliana te an ni. 

Tourism Department aiawhin Pi R. Lalrodingi, Director chuan he program a hlawhtlinna atan mi pawimawhte hnenah lawmthu sawiin, District-Wise Tour Itinerary Creation Competition program hi a khar a ni.