78/2026-2027

Champhai, the 8th of April, 2026: Nimin chawhnu dar 4:00 khan Pu Lalnghinglova Hmar, Minister, Tourism Department hovin Tourism Department, Champhai Nature Conservancy (CNC), Champhai North Joint VC leh Champhaia NGO hrang hrang aiawhte an inkawm a, Hnahsin Kut kalpui zel dan tur leh, kut lian chho zel dawnsawn dan tur an sawiho.

Tourism Minister Pu Lalnghinglova Hmar chuan Champhai khawtlang leh mipui tangrualin Mizorama kut lian ber pakhat an buatsaih thei chu lawmawm a tih thu a sawi a. "Mizoram chhung leh pawn atangin Hnahsin Kut chhim tur an lo la kal belh zel dawn a, mikhual an la pung zel dawn. Mikhual dawnsawn kawngah Champhai khawpui inpuahchah a ngai a, a bikin Tourism kaihhnawiha eizawngte uar zawka zirtirna pek an ngai" a ti.

Minister chuan Champhai District chu pi pute hmun pawimawh tamna a ni tih sawiin, Hnahsin Kut hmanga Champhaia tlawhtute'n district chhung hmun danga tourist site tha tak takte an tlawh tel theihna'n ngaihtuahna sen tul a tih thu a sawi a. "Hnahsin par leh Champhai district mawina behchhanin Hnahsin kut kalpui dan herrem hret theih niin a lang a. Chutiang tur chuan vawiinah hian in rawtna te ngaithla a, sawiho turin kan lo kal a ni." a ti.

Meeting-ah hian Hnahsin Kut kalpui mek dana hmasawn ngaihna lai leh, kut hman dan tihmasawn tura kil hrang hrang atanga rawtna awmte sawiho a ni a. A bultanna’n Champhaia tourism kaihhnawiha eizawng hrang hrang, a bikin homestay, hotel leh restaurant neitute leh tour guide te chu June thla hmain Tourism Department in training pe se tih a ni. A koh khawm leh ruahmanna siam kawngah meeting-a telte chu mawhphurtu ni nghal vek se tih a ni bawk a ni.

CNC in a ngen tawh angin, Hnahsin Kut buatsaih kawnga thawhho dan tur chungchang pawh Tourism Department leh CNC aiawhte'n sawiho nghal a ni a. A buatsaih leh funding kaihhnawih hautak chho zelah, ‘community-based festival’ a nihna bo si lovin sawrkar nen mumal zawka thawhho dan tur ngaihtuah a ni. Sawrkarin festival a buatsaih dan kalphungte sawiho nghal a ni bawk.

Vawiina Champhaia Hnahsin Kut chungchang sawihonaah hian Pi R. Lalrodingi, Director, Tourism Department leh Pi C. Ramsangzuali, Tourist Officer ten Tourism Minister hi an tawiawm a. Champhai Nature Conservancy, Champhai North Joint VC, Zotlang VC leh Sub-Headquarters YMA, Champhai Disrict MJA, MHIP, MUP, MZP aiawhte an tel a ni.