2978/2022-2023
Aizawl the 7th December 2022 : Vawiin khan Government Aizawl College Fest chu College Courtyard, GAC Mualpui Campus, Salem Veng-ah neih tan a ni a, Tourism Minister Pu Robert Romawia Royte chu khuallian niin GAC Fest hi a hawng a, Gym room leh Basketball court te a hawng tel nghal a ni.

Khuallian Tourism Minister Pu Robert Romawia Royte chuan college zirlaite chu college an nundan vawng fel turin a chah a. Thiamna tak tak nei tur chuan zirtirtute leh zirlaite inkarah inhriathiamtawnna leh inngaihsaktawnna tha a pawimawh hle thu sawiin chutianga inlaichinna tha neia hmalam pan turin zirlaite leh zirtirtute chu a chah bawk. Khuallian chuan tunlai khawvelah ‘hriatna leh thiamna hi thiltihtheihna a ni’ tih hi a dikzia kan hmu chho mek zel a, chutiang tur chuan hma in la mek a ni, a ti a. Thiamna leh hriatna kan lakkhawmna (source) erawh a dang tawh hle a, zirlaibu ai mahin Social media hman uar tawh hle a nih vangin, social media hman danah fimkhur a ngai hle a, thudik leh rintlak chauh chhiar a, post thin turin zirlaite chu a chah a. Social media-in Mizoram pawh a chiah hneh hle a, kan hman dik loh nasat avangin khawtlang nun pawhin a tuar mek a, a tha zawnga hman a nih theih nan zirlaite chu midangte zirtirna kawngah hma lakpui turin a sawm a ni. 'Zirna' tih hian a huam zau hle a, zirlaibu chauh ni lovin mihring nun pumpui hi zirlai anih thu sawiin, Pu Robert Romawia chuan kawng engkimah hmasawwna thlen theih hial khawp thiamna nei turin zirchhuah a ngai a ni, a ti. Zirlai tan rilru hrisel neih mai a tawk lo a, taksa hriselna neih tel a ngai a, zirlaite chu an taksa hriselna ngai pawimawh turin Minister chuan a chah nghal a ni. National Education Policy 2020- ah hian ‘Sport’ tih hi vawi-30 zet a inziah thu sawiin, hei hian India sawrkarin infiamna lam a ngaih pawimawhzia a tilang chiang hle a, Mizoram sawrkar pawhin hma nasa takin a la mek zel a, Sikul, College leh University ah pawh infiamna tha dah niin dah belh leh zel tura hmalak mek a ni a ti.

Minister chuan Mizoramah HIV/AIDS vei an pung zel chu lungchhiatthlak a tih thu sawiin zirlaite chu HIV/AIDS dona kawngah mawhphurna an nei ve a ni tih hriain, he natna vei lo tura intiam ngam tur leh midangte hnena ‘awareness’ pe theitu ni turin a sawm a ni. Tun hnaiah Mizoramin hlawhtling taka International Tourism Mart a thlen thu sawiin, State dangte pawhin fakawm an ti hle a ni, a ti a; Government Aizawl College atanga volunteer lo kal zawng zawngte chungah lawmthu a sawi bawk.

Vawiina Fest neih hi Government Aizawl College leh Mizoram Aids Control Society (MSACS) te thawhhona niin MSACS hruaitute atangin HIV/AIDS Awareness speech ngaihthlak nghal a ni. Fest hawnna inkhawm hi Pu Lalbiakzuala, Chairman Organizing Committee chuan kaihruaiin, Students Union General Secretary Pu Hmingchhuanzuala chuan lawmthu a sawi a. Govt. Aizawl College hi kum 1975-ah din niin tunah hian Zirlai 2242, Zirtirtu 55, Non-teaching staff 20 an awm a, Department 9 a awm mek a ni.