2644/2026-2027

Aizawl, the 13th October, 2026: Vawiin khan Tourism Minister Pu Lalnghinglova Hmar chuan Aijal Club, Aizawlah ni thum (3) chhung awh tur Mizoram Travel Fest 2026 a hawng.

He hunah hian Tourism Minister Pu Lalnghinglova Hmar chuan thu sawiin, Mizoramah tourism chu hmuh theihin a thang mek tih a sawi a, Mizo te chuan hnam nunphung humhalh chunga khawtlang mipuite inunauna hmanga khualzin hip (community-based tourism) kan kalpui a tul a ni, a ti a. Hemi tur hian tourism lama mithiamte, tour operators te leh mipuite tanrual a pawimawh tih a sawi bawk. Minister chuan Mizoram hnam nunphungah tanpui ngaite tanpuite, midang ngaihsakte, khualzin chunga that chhuah te chu a bet tlat tih a sawi a, hengte hmang hian tourism lamah hma kan sawn thei a ni, a ti.

Minister chuan khualzin hipna tur atana kut (festival) buatsaih thinte chuan a khaw mipuite tan eizawnna a siam thin a ni tih sawiin, Phuaibuanga Tlaizawng par behchhanna kut buatsaih te chu entirna pakhat a ni, a ti. Thingtlang hmunah te chuan Mizo chaw dik tak leh nunphung dik tak te hmuh tur a awm thin avangin Aizawl pawnah tourism hi kalpui chhoh mek zel a ni, a ti a, Champhaiah Hnahsin Kut te, Lungleiah Leitlangpui Music Festival te chu hlawhtling taka buatsaih a ni tawh tih a sawi bawk.

Minister chuan sawrkar enkawl tourist lodge te chu tihhmasawn zel an tum thu a sawi a, chutih rualin, mimal enkawl homestay te chu khualzinte tan a pawimawh hle a ni, a ti a. Khualzin thlenna homestay te hian thalaite leh hmeichhiate tan eizawnna kawng a hawnsak tih sawiin, khualzinte dawnsawn leh faina kawngah te pawh homestay enkawltute chu tan la zel turin a chah a ni.

Minister chuan Association of Tour Operators Mizoram (ATOM) te chu Mizoram leh a tlawhtu khualzinte inkara inkungkaihna siamtu pawimawh tak an ni tih a sawi a, Mizoram hmun tlawh hlawh lo te pawh kawhhmuh thin turin tour operators te chu a chah bawk a ni. A ram mite ngei pawhin hmun mawi tak tak tlawh loh kan ngah tih sawiin, heng hmunte hi a tihlar kawngah tan kan lak zel a tul a ni, a ti bawk.

Mizoram chuan ramngaw tha tak mai a nei tih a sawi a, a ram mawina chu khualzinte tlawh chak chhan a nih avangin thangthar ten an humhalh a tul a ni, a ti a, ramngaw leh ramsa tichereu lo zawnga khualzinte hip (eco-tourism) kalpui a pawimawh tih a sawi a, khualzin hipna kawngah hman khat daih sarang (plastic) tihtlem kawngah pawh theih tawp an chhuah thu a sawi. Research ti duh zirlaite tan pawh Mizoram chu remchang leh tha tak nia a hriat thu a sawi a, Tourism Department chu Environment, Forests and Climate Change Department leh MZU te nen tanghoin zirlaite chuan Mizorama hmun hrang hrang te an tlawh theih se an tangkaipui a rin thu a sawi.

Minister chuan tunlaiah social media a tangkai tawh hle tih a sawi a, heng hmang te hian kan ram mawina pho chhuak a, khualzin hip kan tum tur a ni, a ti a. Khualzinte chuan Mizoram mawina mai ni loin a rama cheng mipuite nunphung hlutna te chu an hmuhchhuah a pawimawh tel tih a sawi a, chumi tur chuan kan zavaia kan tanrual a pawimawh a ni, a ti bawk. Mizoram Travel Fest-a kalkhawmte chuan hlawkna an chhar ngei a beisei thu a sawi a, hun hlawkthlak tak hmang turin a duhsakna a hlan nghal a ni.

Mizoram Travel Fest 2026 hawnna inkhawmah hian Dr. Lalrozama, Commissioner & Secretary, Tourism Dept chuan inlawmna thu a sawi a, Pu Atul Lahkar, Vice President, Northeast India Chef Association & Ethnic Food Researcher chuan “Promoting Mizo Cuisine as a Tourism Experience” tih thupui hmangin zirtirna a pe a ni. Tourism Minister Pu Lalnghinglova Hmar chuan thu sawiin, Pi Rachel Lalrinhlui, Deputy Director, Tourism Department chuan lawmthu sawiin hun a khar a ni.

Vawiinah hian Tourism Department leh Association of Tour Operators (ATOM)-a hotute, MZU-a Mass communication leh tourism department-a zirlaite an tel a, chawhnu lamah hian thupui hrang hrang zirho a ni ang. Mizoram Travel Fest 2026 hi October ni 15, 2026 thleng neih tur a ni.