1358/2024-2025

Aizawl, the 30th July, 2024: Tourism for all tih thupui hmanga Tourism Awareness Week hman mek zelah vawiin chawhma dar 11:00 khan Tourism Minister Pi Lalrinpuii chuan Tourism Department buatsaih ni 4 (30-July-2024 atanga 02-Aug-2024) chhung awh tur, 'Training for Outsource Facilities' chu ATI Training Hall, MINECO Aizawlah khuallian niin a hawng.

Khuallian Pi Lalrinpuii chuan training chhimtute fuihna thu sawiin, Sawrkarin Tourism Department hnuaia hmunhma pawimawh tak tak a neihte thawhdunna siama midang enkawl tura hlan a nih chhan hriatthiampui tura chahin, tha lehzual zawka hmunhma leh hmanraw neih angte neitu thinlung pu chunga enkawlpui turin a sawm bawk a. Khualzin dawnsawn, ei leh in siam dan, personality development leh sum enkawl dan chungchang thlengin uluk taka ngaihtuahna sen a tul thu kalkhawmte chu chahin, Tourism chu chhiah la lut thei Department a nih piah lamah mipuite ngheng reng Department a nih avangin theihtawp chhuah turin a chah bawk a; training chu hlawkpui ngei turin duhsakna a hlan nghal bawk a ni.

Hun hman hi Pu Lalhmansanga, Jt. Director (Admin) ATI chuan kaihruaiin Pi Golda Del Zohmangaihi, Course Director chuan training kalpui dan tur a sawifiah a. Hemi hnu hian Pi R.Lalrodingi, Director, Tourism Department-in  Mizoram Tourism dinhmun tarlangin trainee-te fuihna thu a sawi bawk.