1582/2022-2023
Date 12.8.2022: Vawiin hian Sialhawk khuaa Lakhuihthei chingtute leh Village Council ?angrualin Lakhuithei Kût an buatsaih chu Sialhawk Community Hall-ah Tourism Minister Pu Robert Romawia Royte-in a hmanpui. He Kût hi lakhuihthei chingtute tihphur nan leh an lakhuihthei thar chhuah te tihlar leh hralh chhuahna kawnga puitu a nih beiseiin Tuichang bialtu Deputy Chief Minister Pu Tawnluia'n a ruahmanpui a ni a. Sum leh pai leh kawng hrang hranga a puihnaah Sialhawk khawtlang an lawm hle a ni.

He Kûta Khuallian Tourism Minister Pu Robert Romawia Royte chuan thusawiin Sialhawk khaw mipui leh thalai ten hna an thawk nasa chu lawmawm a tih thu a sawi a, taima taka hnathawh chu sual dona tha ber a ni, a ti. Hmasawn nan leh ram leh hnam humhalh nan pawh taimak a pawimawh tih sawiin, Japanese te leh Chinese te changkan em em chhan pawh an taimak vang a ni, a ti.

Sports Minister ni bawk Pu Robert-a chuan Sialhawk VC Team te All Mizoram Inter Village Tournament-a Finalist an ni thei chu a lawmpui tak zet tih sawiin, Football Field tihchangtlunna an dil pawh Project siam tawh a ni a, Sanction erawh a la awm loh thu a sawi a ni.

ICT changtu ni bawk Pu Robert Romawia Royte chuan Sialhawk High School tan Computer set Pasarih leh a behbawm te a hlan nghal a. Sialhawk Higher Secondary School building sak nan NECS kal tlangin NGO Project hnuaiah cheng Nuai sawmhnih Pali approval Minute hmuh tawh a ni a, sum Release thuai beisei a nih thu a sawi.

Minister Pu Robert-a chuan Central Sawrkar-in CSS sum Release dan thar a siam zawm theia Mizoram Finance Department an awm chu a lawmawm tak zet a ni, a ti a, hei hian hmasâwnna pawh nasa taka a thlen nghal a rin thu a sawi a. “Ni sâwm chhung leka Mizoram Sawrkarin Vaibelchhe Zasarih chuang a dawng leh ta mai leh CSS leh Sum hnar dang atanga sum tluang taka a dawng chho zel hi Pathian malsâwmna a ni a, Zoram mipui ten lawm nachang i hria ang u. SEDP sem tur sum hi Mizoram Sawrkarin a sum faiin a kawl reng tawh a, tun atanga reilo teah a sem dâwn a, a dawngtu zawng zawng ten rinawm tak leh dik taka SEDP sum te Sawrkarin a pêk chhan ang taka hman tangkai tur a ni" a ti.

Pu Ch.Lalmuanpuia, Additional Director, Horticulture Department pawhin Sawrkar hmalakna sawiin Sialhawk mipui te taima taka hnathawk chhunzawm zel tûrin a fuih a. Khawzawl Addl DC, Pu F Lalbiakrawna,

Chairman Sialhawk Pinaple Growers Society te pawhin thu an sawi a. He function hi Pu J Lalremruata, VCP-in a kaihruai a, function zawhah Kût ruai hlim takin an theh a ni.