4893/2025-2026

Aizawl, the 18th of March, 2026 : Nimin tlai dar 5:30 khan Pu Lalnghinglova Hmar, Tourism Minister chuan Bana Kaih hnuaia ‘District Level Tour Guide’ training buatsaih chu ‘State Institute of Rural Development and Panchayati Raj (SIRD&PR), Durtlangah a hawng.

Tourism Minister Pu Lalnghinglova Hmar chuan Tourism an tuipui vanga training a telte chu a ngaihlu hle tih a sawi a. “Experience nei tha tak tak leh la nei chiah lo te kan ni hlawm a, Tourism Sector hi eizawnna zahawm tak a nih theih nan theihtawp kan chhuah tlan a ngai. Tourist kan tih te hi state pawn atanga lo kal chauh an ni lova, Mizote ngei hi kan state chhungah tourist kan ni thei a, kan tei kual naah kaihruaitu tha kan neih chuan kan hmunhma hmuh te pawh a hlu zual thin a ni.” tiin, trainee te chu an theihna leh thiamna te Mizoram hmasawnna atan hmang turin a fuih a ni.

Minister chuan sawi chhunzawmin, Tourism Department chu Mizoram Department zinga budget tlem leh te ber pakhat ni mah se, eizawnna zahawm thahnem tak siam thei turin ke a pen mek a ni a ti a. “Kan ram nuam tak hi thawnthu mawi tak sawi chung zelin khawvel ram zau zawkah kan tar chhuak dawn a ni.” a ti.

Tour Guide te tana training hi Tourism Department in khualzinte mumal zawk a enkawl an nih theih nan a duan niin, mi 110 training tura ruahman a ni a. Tun hi a batch hmasa ber niin mi 40 an tel phawt dawn a. batch dang pahnih la awm tur a beisei a ni.

Training hawnna programme-ah hian Pu R. Lalremsanga, Director, SIRD&PR in inlawmna thu sawiin trainees te chu ruihtheihthil a fihlim turin a fuih a. Pi R. Lalrodingi, Director, Tourism Department pawhin thu sawiin, Sorkar flagship programme Bana Kaih hnuaia sponsor dawn kaltlangin Training Institute changtlung taka training buatsaih a ni thei leh, Tourism Minister in a ngaihpawimawhnaah lawmthu a sawi a ni.

Pi Rachel Lalrinhlui, Deputy Director, Tourism Department in Technical Report pe in, training dil zingah beisei beisei aiin Aizawl District pawnlam an tlem deuh tih a tarlang a. Hlawhtling taka training chhuak te chu Tourism Department atangin Provisional Certificate kumkhat chhung atan pek an nih tur thu leh, a hnuah kum 2 atan register an nih theih tur thu a tarlang a. Kum 2 hnuah pawh an tihthat dan azira renew zel theih tur a nih thu a sawi a ni.