148/2025-2026

Aizawl, the 11th of April, 2025: Vawiin chawhnu khan Pu Lalnghinglova Hmar, Minister of State, Tourism Department chuan MINECO-a Tourism Directorate a tlawh a, department hotute nen inkawmna hun tha tak an nei.

Tourism Minister chuan department tana a hmathlir thenkhatte tarlangin, department official te nen thawhhona tha tak an neih a beisei thu leh phurawm a tih thu a sawi a. “Tourism hmasawnna chu building sak leh cheithat mai piah lamah, tourist an pun leh pun loh atangin a lang chiang dawn a, kum hmasa aiin Mizoram tlawhtu tourist ngah kan tum tur a ni” tiin Tourism Department hlawhtlinna chu khualzin zat ațanga teh tur a nih thu a sawi. 

Pu Lalnghinglova Hmar chuan sawi chhunzawmin, “Mizoram in tourism ah potential a nei tha kan ti thin a, chutihlaiin țhenawm state-te neih loh eng nge kan neih bik? Tlang, ruam leh lui inang kan nei a, hei vang tak hian țhenawm state aia tlawh chakawm turin Mizoram kan chei a, kan phochhuah a ngai. Chumi tur chuan kawng tinrenga kan țan a ngai a, infrastructure siam belh ringawt a tawk dawn lo” a ti.

 Mizoramah tourist te rei zawk an châm theihna’n tourism package mumal tak neih a ngai tih a sawi a. Aizawl khawpui chu India ram state khawpui dangte ang lo takin hmun khat atanga lang zau thei, view mawi em em nei a ni a, hei hi kan pho chhuah thiam a ngai, " tiin Mizorama hmun mawi bikte kan chei rualin khawpui chu khualzin tlawh hmasak a nih țhin avangin chei a țul a, mipui pawh khualzin dawngsawng tura an inpeih a ngai tih a sawi.  

Khualzinte tan thlenna hmun him leh rintlak zawk chhawpchhuah turin homestay kan neih mekte enfel (regulate) a, inkaihhruaina mumal zawka kalpui a tul tih Tourism Minister chuan a sawi a; Mizote’n Krismas kan lawm dan chu khawvel danga awm ve lo a nih avangin state leh ram pawn lam mite pawhin chhim ve an châk tur niin phochhuah theih a rin thu a sawi bawk. 

Tourism Minister hi Director Pi R. Lalrodingi hovin official leh staff te’n an lo dawngsawng a, department kalphung, hmalak mekna leh hmachhawp tlangpui te inpawh takin an sawiho a ni.