4330/2025-2026

New Delhi, the 6th of February, 2026 : Vawiin chawhma khan Pu Lalnghinglova Hmar, Tourism Minister, Mizoram leh Dr. V.K. Paul, Member, NITI Aayog te chu New Delhi-a NITI Aayog Headquarters-ah an inkawm a, Mizoram-a Tourism Conclave neih dan tur chungchang an sawidun. He hunah hian ITDC leh NITI Aayog hnuaia Tourism wing aiawhte an tel a ni.

Meeting-ah hian Mizoram Tourism Minister Pu Lalnghinglova Hmar chuan thu sawiin, tunhnai kumhnih chhungin Mizoram tlawhtu nasa takin an pung a, September 2025 a Sairang thleng rel a luh hnuah phei chuan beisei phak bakah tourist an pung tih a tarlang a. “Tunah chuan Guwahati atangin tlai khat thilthuah Aizawl a thlen theih tawh a. Thlawhna leh rel a inkalpawhna a awlsam tawh avangin Mizoram tlawhtu an pun zel kan ring. Heng kan state rawn tlawhtute lo dawnsawn dan tur te, an thlenna leh ei leh in chungchanga lo inbuatsaih te, an en tur leh tihtur lo siamsak chungchangah te hmalakna tur tamtak a la awm a. Theihtawp chhuah mah ila keini chuan thlen tâwp chin kan nei.” tiin NITI Aayog chu rem ruat pui a, hma lak pui turin a sawm.

Mizoram Tourism Minister chuan sawi chhunzawmin, Mizoram mawina chu infrastructure ropui ni lovin khuarel mawina a ni tiin, tlang leh ruam, lui leh dil mawi tak takte tichhe si lova tourist hipna’n tihhmasawn a duh tih a tarlang bawk.

NITI Aayog member Dr. V. K. Paul chuan Mizoram chu tunhnaiah 100% Literacy rate nei thei, state ralmuang leh tlawh chakawm a nih thu a tarlang a. Tourism Conclave chu Mizoram thatna leh mawina te phochhuahna remchang a nih tur thu leh, a tulna apiangah Mizoram sawrkar pui tura NITI Aayog a inhawn thu a tarlang. Mizoram tlawhtute bakah state mipui kaihhruaina’n Tourism Policy mumal tak buatsaih thuai tul a tih thu a sawi bawk.

Vawiina meeting chuan Mizoram Tourism Conclave chu Aizawl emaw, a bulhnaiah hman nise tiin a rel a, a hun atan kum chanve hnulam, boruak nawm lai nise tih a ni. International Tourism Mart emaw, Mizorama kût awmsa nen kaihkawpa lian leh zau zawka hman dan ngaihtuah tha tih a ni bawk.

Mizoram Tourism Conclave buatsaih tur chungchanga inpuahchahna’n, kumin kum chanve hmalamah New Delhi-ah kokim zawka meeting neih leh ngei nise tiin rel a ni a. Hetah hian sawrkar mi pawimawh bakah Delhi-a tourism kaihhnawih pawl pawimawh hrang hrangte sawm nise, NITI Aayog in hma lo la se tih a ni. Mizorama a taka tourism kaihhnawih eizawnna kalpuitute aiawh sawm tel nise tih a ni bawk.

Vawiina NITI Aayog Headquarters-a meeting ah hian Pu Alexander V. Chongthu, Addl. Resident Commissioner, Mizoram House, New Delhi leh Pu H. Lalramenga, PS te’n Minister hi an tawiawm a ni.

Sports Minister ni bawk Pu Lalnghinglova Hmar hian vawiin chawhnu vek khan Pu Hari Ranjan Rao, Secretary (Sports), Ministry of Youth Affairs & Sports pawh hmuin, sports-a Mizorama hmalakna tur hrang hrangte an sawidun bawk a ni.