No.1409/2020-2021

Dated Aizawl, the 27th May, 2020: Ni 26.5.2020 khan Tourism Minister Pu Robert Romawia Royte chuan COVID-19 vanga Tripura leh Assam ramria duty te tlawhin Mamit DC leh khawtlang hruaitute chuan Mamit Multipurpose Indoor Hall sak meknaah an lo dawngsawng a, Minister chuan Mamit District chu Sorkar laipuiin District dawmkan ngai bik - Aspirational District leh Minority Concentration Area-ah a puang chungin tunhma zawng khan he district hian a phu tawk angin hmasawnna a hmu tawk lova, sorkar tharah erawh hi chuan chak takin sorkarin hmasawnna hna a thawk tan mek a ni, a ti a.

Minister Pu Robert Romawia Royte chuan Tripura leh Assam ramri venga hmun hrang hranga duty VLTF te tlawhin Mizo tlawmngaihna nena duty te chu sawrkar chuan a fakin a chhuang takzet tih a hrilh a, hripui leng karah kan boruak tawn mek hi politics hmanga mahni sahmim hampuar zawnga inchirhtheh nana hmang lova party tinte pawh tanrual hun a ni tih hriat a pawimawh tak zet tih a sawi. Minister chuan Sorkar leh NGOs te leh Kohhrante kan tangrual tha em em a, Political party tinte pawhin COVID-19 avanga harsatna hi politics-a inchirhtheh nana hmang lovin Sorkar, NGOs leh Kohhran te tanrualna angchhungah hian infinchhuaha tanho zawk hi hnam hmangaihna lantirtu a ni zawk, tiin a sawi.

Hachhek Bial chhunga Group YMA 2 - Taitesena Group YMA leh Langkaih Group YMA te pawhin Minister hi tawiawmin ramri kil tina Duty posts te an tlawh hova, Group YMA 2 te hian Sorkar tawiawma theihtawp chhuaha duty zui zel an tum thu Minister hi an lo hrilh a ni.

Minister hian Tuidam leh Vanghmun, Tripura inkara Chhimluang-Langkaih kaia New Eden bula IR Police duty te tlawhin Police te chu Hrukpuan(Towel) a pe theuh a, Village Level Task Force duty te Chess Board leh Draugh board a pe bawk. Tunhnaia rial lianin Rengdil leh Zamuang khua a denchhiat in thenkhatte tlawhin Mizoram Sorkarin Rangva a sem turte a endik bawk a, MLA Er. H.Lalzirliana nen Zamuang leh Rengdilah hnatlang puih nan Rs 10,000/- ve ve an pe bawk.

Assam ramri Kolalian duty post pawh tlawhin he ramri hmunah hian Taitesena Group YMA te hnenah Rs 50,000/- leh Sanitizers Litre 20, Face Mask 100, Hand Gloves 100, PPE Suit 5 leh thosi hlauh damdawi a hlan a, Duty te sa lo eikhawmna tur sum a pe bawk.

Minister hian Zawlnuam chhaka awm Zawlpui khua leh a bul Tripura ri-a IR Camp a tlawh bakah Kanhmun thlang Mizoram leh Assam inrina Medeli-a duty te tlawhin duty post hrang hrangah hian an ei in tuituah nan sum fai a hlan vek a ni.

Zawlnuam Tourist Lodge-a Langkaih Group YMA te leh VC te, Village Level Task Force te nena an inkawmnaah Minister Pu Roberta chuan Ramria duty te Sorkarin a ngaih pawimawh thu leh a chhuan thusawiin Mizo hnam himna atana dai theutu an ni a ti a. COVID-19 avangin state dang nen inpawh zung zung a remloh avangin Langkaih ruam ramthate chu hmang tangkaia Mizo thalaiten nasa zawka hnathawka buhbal leh thlai dangte ching uar turin a fuih a ni. Minister chuan Langkaih Group YMA te hnenah Rs 50,000/-, Silpouline Bundle 1, Sanitizers 20 Litre, PPE Suit 5, Gloves 100 leh Face Masks 100 a hlan a ni. Minister hian Village Level Task Force 7-ah Rs 10,000/- theuh duty te tanpui nan a pe bawk.

Minister hi Mamit bialtu MLA Er. H. Lalzirliana bakah 4th IR Commandant Pu Lallianmawia, Sports & Youth Services Director Pu Lalsangliana, Pu Vanlalliana, Addl. S.P Security bakah Taitesena Group YMA leh Langkaih Group YMA leh official engemaw zatin an tawiawm a ni.