No.1487/2021-2022

Aizawl 20th July 2021: Vawiin khan Pu Romawia Royte, Tourism Minister chuan International Conference on North East India Tourism, Tezpur University leh Finderbridge Tourism in an huaihawt chu khuallian niin video conference kaltlangin a hman pui.

Pu Robert Romawia Royte chuan North East India ah Tourism chuan hmabak eng tak a neih thu sawiin North East State hrang hrang te thawk ho a, hripui kiam hnuah khualzin tam zawk hip a tul thu a sawi a. Look/Act East Policy avangin ASEAN leh Indo-Pacific ram hrang hrang atanga khualzinte tan pawh North East India chu tlawh man hla tak tur an nih thu a sawi. Cross Border Cultural Tourism nasa zawka kalpui a hun, niin Tourism Minister chuan a sawi.

Mizoram a tourism hmalakna chungchang sawiin, Pu Robert Romawia Royte chuan Mizoram chu hmun ralmuang, hmun reh raih mai leh khualzin tam zawk ten an tlawh pawh loh a nih avangin hripui a zawh hi chuan Mizoram chu khualzin te tlawh chak ber tur a nih thu te, chumi atan chuan Mizoram Sawrkarin ruahmanna hrang hrang a siam dan te he Virtual Conference ah hian a sawi a. Mizoram ah Tourism sector hi thalaite tan eizawnna tlak a siam a tul thu te, chumi atan chuan destination based skill development training te Mizoram in an buatsaih thin thu te leh tun hnai maiah Tour Guide 83 lai Department in a chher chhuah te a sawi lang bawk.

Pu Robert Romawia Royte chuan North East State hrang hrang leh Mizoram chu tourism hmasawnna tur kawnga thawk ho a, information hrang hrang te inhrilhhre tawn zel turin kalkhawmte a chah bawk.

International Conference on North East India Tourism hi virtual a neih a ni a. North East State hrang hrang atangin Sawrkar Official te bakah, tourism service stakeholders leh service providers hrang hrang tel in, Mizoram atangin Secretary leh Director bakah tourism service providers ten an tawiawm a ni.