No.2061/2020-2020       

Aizawl, the  15th June 2020: Vawiin YMA Day denchhenin Pu Robert Romawia Royte, Tourism Minister leh Aizawl East-II MLA ni bawk chuan a bial chhunga YMA Branch 7 te an Vengah kalin YMA Day  lawmpuina chibai bukin a tlawh chhuak vek a. YMA Day chibai buk nan YMA Branch 7 te hi Rs. 10,000/- theuh a pe a ni.

Tourism Minister chuan  a bial chhunga YMA Branch hrang hrangten Covid19 avanga harsatna mipuiin kan tawh mek laia an hmalaknate fakawm a tih thu a sawi a. YMA branch tinte hnenah lawmpuina tangkafai a pek bakah Minister chuan a chenna Chhinga Veng Branch YMA ten YMA Day puala mi dangte tanpui nana an hmalakna puih nan Rs. 20,000/- a thawh bawk a ni. Heng YMA branch pasarih te a tlawhnaah hian Tourism Minister Pu Robert Romawia Royte chuan kumin hi Zirna Uar Kumah YMA-in kan puang a, Member zawng zawngin mahni zawn theuhah bawhzui theuh chu kan bat a ni  a ti a. Aizawl East-II bial chhunga HSLC pass thar mi 276 te hnenah an Branch YMA te kaltlangin Pass Lawmpui nan Dictionary tha chi a sem nghal theuh bawk a ni. 

Tourism Minister hian a biala Local Task Force te pawh a tlawh chhuak vek bawk a. A bial chhunga mipuite chu Covid-19 avanga chi-ai mai lo tur leh an tihdan pangngai anga Sorkar hmalaknate tawiawm a Local Task Force te thu leh hla ngaichanga zawm turin a fuih a ni. A bial Veng tina taima taka Task Force duty te chu fakawm a tih thu a sawi a. Hmui tuamna(mask) 1550 chu a biang chhunga Local Task Force 7 te hnenah hian a sem a, a tul apianga pui tura a inrin reng thu a hrilh hlawm bawk a ni.