Vawiin khan Union Tourism Ministry huaihawtin Ashoka Hotel, New Delhi-ah National Conference of Tourism Ministers  neih a ni a. Union Tourism Minister Pahlab Singh Patela'n a hmanpui a ni.

He hunah hian Tourism tihhmasawnna tura hmalakna hrang hrang te leh hmalakna thar turte sawiho a ni a. Union Tourism Minister leh Union Tourism Secretary kaihhruaina hnuaiah Union Tourism Ministry Official ten presentation an pe a, State hrang hrang Tourism Minister ten an hmalaknate leh hmalak tum dante an sawiho bawk a ni.

Mizoram Tourism Minister Pu Robert Romawia Royte pawhin Union Ministry-in IT hmang tangkaia One Stop Solutions an duang thar chu lawmawm a tih thu a sawi a, NE India-ah mobile leh internet connectivity a chhiat avanga harsatna awm thei te sawi langin Tourism Ministry leh IT Ministry thawhho a pawimawh a tih thu a sawi.

Mizoramah Adventure Tourism leh Sports Tourism tihhmasawn theih a nih dan sawiin nakkum February thlaah World Paragliding Accuracy Competition chu Serchhipah neih a nih tur thu a sawi bawk. Union Minister chu Thenzawl Golf Course hawng tura a lo sawm tawh angin a hman remchan theih hun tur tichiang thuai turin a ngen a, Union Minister pawhin tihchian thuai  a tum thu a sawi nghal a ni. Pu Robert Romawia Royte chuan State hrang hrang Tourism Minister te leh Official te chu Mizoram tlawh turin a sawm bawk a ni.