North East Zone Cultural Centre (NEZCC), Dimapur leh Mizoram sorkara Art & Culture Department te tangkawpin vawiin khan Vanapa Hall, Aizawl-ah ‘Traditional Music Festival’ buatsaih a ni a. Festival-ah hian Mizoram bakah hmarchhak state 3 dang - Manipur, Assam leh Meghalaya - te an tel a, Mizoram Art & Cultute Minister Pu P.C.Zoram Sangliana chu Khuallian niin he rimawi kutpui hawnna hun a hmanpui a ni.

 

 

Khuallian chuan thu sawiin NEZCC chuan an thupui “Unity through Culture” a nih ang ngeiin India hmarchhak state ten ramchhung leh pawnah hnam ziarang, rimawi leh lam te phochhuahna hun remchang a siamsak fo thei thin chu lawmawm a ni, a ti. NEZCC dintu India Prime Minister hlui Pu Rajiv Gandhi pawhin he pawl a dinna chhan chu India hmun dangte leh hmarchhak bial inkara inlaichinna leh inhriatthiam tawnna tha zawk a awm thei nan a nih mai bakah hmarchhak state te inkarah ngei pawh inunauna nghet zawk a awm theih nan a ni, a ti bawk. Mizote leh hmarchhaka cheng hnam dangte chuan India mi nia inngaiin hlim taka kan awm laiin India rama hnam cheng dangten India mi anga min hre lo thin chu a pawi a, kan hnam zia leh tih danphung te kan inhrilhhriat leh inngaih pawimawh sak tawn zual a tul hle a ni, a ti. Tun hnaia Mizoram Chief Minister-in hmarchhak biala chengte chu India rama harsatna kan tawh thin a sawichhuak chu a ropui a ni tiin Art & Culture Minister chuan India rama cheng hnam leh sakhua hzawng zawngte chu hmun khata luangzaa inpumkhat hi kan tih tur dik tak a ni ang, a ti.

Pu P.C.Zoram Sangliana chuan Hindi tawng pawimawhna sawichhuakin India rama mihring maktaduai 1000 chuang chhiar theih turin kan hnam chanchin leh thawnthu te letling ila, hnam dangten Mizo hnam min hre thiam zual ang tiin Mizo zinga Hindi thiamte chu helamah an tha thawh turin chona a siam a ni. Minister hian Art & Culture Department hmalakna tur hrang hrangte a tarlang a - July thla chhungin Victoria Memorial, Kolkota nen tangkawpin Aizawl-ah Art & Photo Exhibition buatsaih a nih tur thu te, August thlaah Aizawl-ah bawk Mizo hmeichhe hnam incheina hrang hrang phochhuahna tur ‘Women’s Festival’ te leh October thlaah Kolkota-ah ‘Mizo Festival buatsaih a nih tur thute a tarlang a ni.

Art & Culture Jt. Director Pu Ngurbiaka pawhin Festival-a tel tura state dang atanga artiste lokal te leh Festival chhimtu zawng zawngte lawmna thu a sawi a. NEZCC leh Mizoram Art & Culture tangkawpin July ni 29-ah ‘Choral Festival’, August 19 & 20-ah ‘Costume Exhibition-cum-Sale’, Mizoram Inter-Collegiate Cultural Meet te, November thlaah ‘Art Camp’ leh February 2010-ah Poets’ Meet an buatsaih chho tur thu a sawilang a ni.

Vawiina Traditional Music Festival-ah hian Meghalaya, Manipur leh Manipur atangin zai leh lam chi hrang hrang entir a ni a. Mizoram atangin Bungkawn Cultural Club leh Hnahlan Cultural Club ten Mizo hnam lam leh zai an entir bawk a ni.