585/2024-2025

National Dairy Development Board (NDDB), Anand, Gujarat, AH & Vety. Department, Govt. of Mizoram, Mizoram State Rural Livelihoods Missions (MzSRLM) leh SIRD&PR, Mizoram tangkawpin 28 May - 13 June, 2024 ni 17 chhung awh tur 'Training for A-Help (Accredited Agent for Health and Extension of Livestock Production)' neih a ni dawn a. Vawiin khan SIRD&PR Conference Hall, Durtlang Leitan-ah SIRD&PR Director Pi Ethel Rothangpuii'n training hi a hawng a ni.

Training hawnna hun Dr. TC Lalthanzauva, State Nodal Officer, A-Help, Mizoram/Deputy Director (Piggery Development), AH&Vety Department kaihhruaiah Pi Ethel Rothangpuii chuan khawchhe tak hnuaiah training nei tura mahni inchhung lum chhuahsana rawn kalkhawmte chungah lawmthu sawiin, hetiang ang training pawimawh tak mai Sorkar-in a ruahman hi ṭha a tih thu a sawi a, thingtlang khaw hrang hrangah ran enkawl kawnga thiamna nei tura training buatsaih a ni hi a lawmawm a, training nei tura lo kalkhawmte pawhin mahni khua/veng tana hlawkpui ngei tura taima taka training chhim turin a sawm. Training an neih zawh hnua an hriatchian tawkloh leh harsatna an nei a nih chuan AH&Vety Department leh
SIRD&PR, Mizoram te chuan anmahni ṭanpui turin engtiklai pawhin an inhawng reng a ni tiin a chah a. SHG-te an hnathawh ropui a tih thu leh training hlawhtling taka an neih ṭheuh theih nana duhsakna a hlan a ni.

Dr. Lalhruaitluangi Sailo, Training Manager, A-Help/Senior Core Faculty chuan training neih dan tur kalphung leh hriattur tlangpuite a tarlang a. Ran enkawlna atana an hman tangkai tur 'A-Help Kit' chu training tura kalkhawmte pek vek an ni bawk. He training-ah hian Mizoram chhunga RD Block 9 heng - Thingdawl, Bilkhawthlir, Serchhip, East Lungdar, Champhai, Sangau, Lawngtlai, Siaha leh Tipa aṭangin MzSRLM hnuaia Livestock Community Resource Persons thlan bik mi 50 te batch hnihah thenin training pek an ni ang. Master Trainers- Dr. Charlie Chawngthu, Dr. Zohlimpuia, Dr. MS Dawngliana, Dr. John Beizalaisa Khithie, Dennis V. Lalhlimpuia, Lalremtluanga leh External Facilitator-ten an zirtir dawn a ni. Training hawnna inkhawm hi Dr. Charlie Chawngthu, Veterinary Officer, AH &Vety Department, Lawngtlai chuan lawmthu sawiin a khar a ni.