1571/2024-2025

Aizawl 13th August, 2024 : Vawiin khan Operation Ginger atana inbuatsaih nan Horticulture Department a Officer te leh Field Staff zawng zawngte'n Sawhthing tâm leh natna ven dan leh enkawl dan zirin "Training of Trainers for Operation Ginger" neih a ni.

Kumin hian Zoram pumah Sawhthing ching an tam a, tun hnaiah Zoram hmun hrang hrang atangin Sawhthing tâm sawi a tam hle a. Hei vang hian Horticulture Department chuan hma la nghalin District tina DHO te'n report an thehlut a, tun thlenga report chinah khaw 263-a Sawhthing chingtu chhungkaw 6586 te Sawhthing a tâm tawh a. Mipuite zirtirna atan Horticulture Department chuan DDK-a chhuah turin Horticulture mithiam te'n a hmunah Ni 7 August, 2024 khan an lo kalchilh tawh a. Zonet Cable TV a chhuah turin Ni 12 August, 2024 khan an kalchilh bawk a ni.

Vawiina inzirtirna hi Zoram puma Horticulture Department hnuaia thawkte kokim zawka inzirtirna neih a nih theih nana buatsaih niin mithiamte'n Sawhthing tâm enkawl dan uluk takin an zirtir a. Ruahman lawk ang chuan Ni 16 August, 2024 hian Sawhthing tâm beihpuithlakna "Operation Ginger - Fehchhuah Runpui" chu Directorate of Horticulture Office atangin Prof. Lalnilawma, Horticulture Minister-in a vailiam dawn a. Thawktute'n District tin tuamin an fehchhuak ang a, hemi atan hian Sawhthing natna te, a bawmtu rannungte leh a enkawl dan lehkhabu te siam nghal niin a enkawlna damdawite pawh theih ang anga ngaihtuah mek zel a ni.

Horticulture Department chuan Sawhthing chingtute chu lo beidawng mai lo tur leh mithiamte thurawn anga an Sawhthing hmunte chu tha thlah lova lo enkawl zel turin a chah a ni.

Vawiin Training hi Pu C.H. Lalmuanpuia, Director, Horticulture Department chuan a kaihruai a. Dr.H. Vanlaldiki, Dy. Director, Horticulture Department chuan kalkhawmte zirtirna a pe a. Sawihona hun tha tak hmanho a ni bawk. He Training-ah hian Mizoram pum atangin thawktute an kal tha hle a ni.