Vawiin chawhma khan Vanapa Hall-ah ‘Training on Aizawl Jam Free Project’ neih a ni a. Training hi NEDP hnuaia Transport Department buatsaih a ni.

Training hi Co-ordination Committee on Traffic Management Working Group Committee Chairman Pu Lalbiakzama’n a kaihruai a. Transport Jt. Director (Hqrs) Pu R. Lalrammawia’n Aizawl Traffic Jam Free atana hmalakna hrang hrang a sawi a. Resource person atan Transport Director Pu R. Remmawia, Aizawl Traffic SP (Sr.) Pu H. Ramthlengliana, AMC Councilor Pu R. Lalbiakthanga leh I&PR Director Pu David L. Thangliana hman an ni. Anni hian Aizawl Traffic Jam Free Project thil tum hrang hrang: khawpui chhunga lirthei chevel rang zawka an duhna hmun an thlen theihna tur te, petrol/diesel hman tlem te, public transport bus leh taxi hman uar te, pollution tihhniam te, khawpui hrisel zawk neih dan chungchang te an sawi a. Hemi bakah hian Mizoram (Regulation and Control of Vehicles Parking)(Amendment) Rules 2018 hmangin lirthei dahna tur hmun ni lova dah te pawisa chawitir theih an ni a, lirthei man nawn an nih chuan an chawi tur a let hnihin (double) a pung zel dawn a ni tih te, hnuhsawn ngai lirthei a awm chuan Transport Department hrilh theih an ni tih te, traffic police ten hma an lak dan te, AMC hmalakna te, kawng tha pawimawhnate, Aizawl khawpui traffic jam lo tura inhrilhhriatna neih a pawimawh thu te leh hemi atana Local Council pawimawhnate tarlan a ni.   

Aizawl Traffic Jam Free Project hnuaia hmalakna hrang hrang te chu:

1)Awareness & Publication

Mipui ten hrilhhriatna tha zawk an neih theih nan chanchinbu, local TV channel, hoarding, leaflet, bookmark, rally hmangin Aizawl traffic a ziaawm theih nan hmalak a ni a. Zirlaite tan inhrilhhriatna hun buatsaih tum a nih bakah YMA branch hrang hrang inelna quiz buatsaih tum a ni bawk.

2)Capacity Training

Hemi hnuaiah hian AMC, Traffic Police, Enforcement staff, Local Council tan training hrang hrang neihpui an ni.

3)Purchase & Installation of Traffic Equipments

Aizawl khawpui traffic jam lohna hmuna siam tura thawktu Traffic Police mamawh hrang hrang ngaihtuahsak an ni.

4) Purchase of towing truck & improvement of Enforcement

Aizawl khawpui chhunga lirthei dahsawn ngai hnuksawn zung zung tur Towing Truck pali lei tura ruahmanna siam a ni a, hemi hmang hian hna thawh thuai beisei a ni. Hemi bakah hian enforcement duty-te tan TATA Sumo pakhat lei a ni.

5)Vehicle Smoke Analayser

Aizawl boruak a thianghlim zel theih nan khawpui chhunga Petrol Pump sawm (10)-ah pollution endikna khawl bun a ni.

6)Garage numbering & site preparation

Aizawl khawpuiah Local Council nen tangkawpin lirthei nei zawng zawng ten garage nei vek turin hmalak a ni. Aizawla veng hrang hrangah vantlang ram, lirthei dahna tura siam theih cheibawl tura hmalak a ni a, Ramhlun Vengtharah leh Tuikual South-ah siam tum mek a ni.

7)Public parking

Lirthei dahna tur hmunpui Traffic Complex, Chaltlang-ah sak tura hmalak a ni a. Hemi bakah hian Zodin-ah Multi Level car parking leh Govt Mizo High School Multipurpose Hall siam that a, a hnuailam parking nana hman tum a ni bawk.

He hunah hian Aizawl Traffic Jam Free Project Booklet Working Group Committee Chairman Pu Lalbiakzama (Addl. Secretary Home) in a tlangzarh a. Training hi Local Council, Traffic Police leh Enforcement Staff-te tan buatsaih a ni.