Nimin khan Horticulture Conference Hall-ah Transport Minister Pu P.C. Zoram Sangliana hovin Department Officer te chuan 'Performance Review Meeting' an nei. He meeting hi Pu Dawngliana, Director-in a kaihruai a ni.
Pu P.C. Zoram Sangliana chuan Transport Department chu mipui te tana rawngbawltu Department an nih angin, rinawmna leh dikna vawng nung tur leh rintlak taka an hna thawk turin a fuih a. Minister chuan Transport Department hi Earning Department (sum thawkchhuaktu department) anga a rawn lang chhuak hi officer leh a thawktu dangte thawrimna rah a ni a ti a, hetiang anih theih reng nan re-structuring neih chu a pawimawh hle ani a ti. Driving License leh Fitness Certificate-te chu dan ang thlapa pe chhuak thin turin a hrilh a; hemi pekchhuah chungchangah mi hausa leh mi thiltithei te  dan lo anga anmahni lo kar thin an awm chuan, an hotute leh amah ngei pawh hriattir thin turin a chah bawk. Transport Department tihchangtlun nan Test Driving Simulator te, Weigh Bridge te nei a tul zia sawiin, ngaihtuah mek a nih thu leh booking station te pawh thuamthat a tul thu a tarlang a. Transport Department ambulance-te chuan Health Department rate anga ruang an phurh thei ve tawh tur thu Minister chuan a sawi bawk.

Minister chuan Department hmasawnna hrang hrang tarlangin JNNURM hnuaia Bus thar 14 lai mai an tlan tir thei chu lawmawm a tih thu sawiin kalkhawmte chu Department hmasawnna atan engtiklai pawha an rilru leh ngaihtuahnate seng thin turin a chah nghal a.

He Review Meeting a hian MST chungchang, Revenue chungchang, Accounts lam, Reports & Returns chungchang ah te Officer ten thusawina neiin sawihona, zawhna leh chhanna hun hman nghal  a nia . Minister hian Transport Department hnuaiah  kum 2008-09 leh 2009-10 chunga DTO office leh Station hrang hrang ten  MST, Motor Vehicle leh Compounding Fees lamah Revevue Target an khumthat lawmman a sem nghal a.

Transport department hian kum 2009-10 chunga Sawrkar in Sum thawhchhuah tur (Revenue Target) a bituk cheng nuai 933 chu khumin, cheng nuai 1015.82 an thawk chhuak a; cheng nuai 82.82 in Revenue Target chu an khum a ni.