Vawiin khan Transport Department Director Pu R. Remmawia pisa ah Transport Department aiawh leh I & PR Department aiawhte an inkawm a, Transport Department hnuaia hmalakna hrang hrangte mipuiten tangkai lehzuala an chhawr theih dan tur an sawi ho.

Mizoram Transport Department hian India ram state dangte hnathawh thin bakah Public Bus Service an enkawl a, heng Transport Bus hmang tangkaitute leh Bus enkawltute inkara harsatna awm thin chi hrang hrangte chinfel dan tur ni a tha te sawiho a ni a.

Vehicle Tax hrang hrang leh Road Tax chungchangte pawh sawiho a ni bawk. Tunhnaia Two Wheeler Taxi kalpui thar pawh mipuiten an chhawr tangkai zia sawichhuah a ni a, naupang sikul kai hruaina a tan te, bungraw chah lo thleng lam saktu a tan te, damdawiin leh doctor te clinic a hming ziah sak tu a tan te two wheeler taxi leh a khalhtute mipuiin an hmang tangkai thin hle. Hei bakah hian Aizawl khawpui daifema Auto-rickshaw service pawh mipui ten an hmang tangkai tawh hle tih an sawi a ni.

Transport hotute chuan State transport Authority in Taxi chuan man a bituk felsa thlap a, mipuite hian hrechiang se a rate aia sanga Taxi hman man dil a awm a nih chuan STA office ah complaint theih reng a nih thu an sawi. Aizawl Traffic Jam tih nepna tura ruahmanna DPR pawh siam fel vek tawh niin sawrkar-in a pawmpui veleh hnathawh nghal a nih tur thu an sawi a, hemi atana hmalakna hmasa lirthei neitu zawng zawngin a dahna (garage) October 31, 2017 hmaa neih vek tur tih pawh chu lirthei neituten zawm ngei a ngaih tur thu an sawi bawk.

Vawiin inkawmho na ah hian sawrkar-in hmalakna thar a siam dawnin mipuite hrilhfiah a an hriatthiam loh te hrilhfiah hmasak thin a pawimawh thu te an sawi a, hmalak dan tur chi hrang hrang an sawiho a; Transport Director chuan sawrkar department ten mipui rawng an bawlsak kawnga mipuite nen thawhhona tha zawk siam a pawimawhzia hria a I & PR Department in ruahmanna tha tak nen hman an la chu lawmawm a tih thu a sawi a; an lakah beiseina sang tak a neih thu a sawi a ni.

Vawiin inkawmhona ah hian Transport Department aiawhin Pu R. Remmawia, Director leh Pu R. Lalrammawia, Joint Director an tel a, I & PR Department aiawhin Pi Lalnithangi, Director; Pu David L. Thangliana, Joint Director leh Pu Andrew H. Lalremruata, Media Officer, I & PR Media Cell te an tel a ni.