No.277/2020-2021

Transport Minister Pu TJ Lalnuntluanga kaihhruaiin vawiin khan State pawn atanga Mizoram chhunga mamawh phurhluh chungchanga inrawnkhawmna neih a ni a. He inrawnkhawmna ah hian Chief Secretary Pu Lalnunmawia Chuaungo bakah Task Group on Transport memberte, Home leh Supply department hotuliante bakah Mizoram Truck Drivers’ Association leh Mizoram Truck Owners’ Association hotute an tel a ni.

Meeting kaihruaitu Transport Minister Pu TJ Lalnuntluanga chuan khawvelin hun khirh tak a tawn lai a nih vangin Mizoram pawh kan bang bik chuang lova, inthlahdah lova theihtawp chhuah a kan fimkhur zual a ngai a ni a ti a. Mizoram mamawh eitur leh bungrua chi hrang hrang kan lakluh reng a la ngaih si avangin hengte hi engtin nge him taka kan kalpui ang tih kan ngaihtuah a ngai a, Mizoram mamawh rawn phurluttu lirthei khalhtu a bik takin truck driver te chu Medical Workers, Police leh Local Task Force te ang bawka ral hmatawnga huaisen leh tawrhchhel taka pen chhuak an ni tih sawiin ram leh hnam tana an inpekna a ngaihsanawm hle a ni tih a sawi a. Mizoram mamawh phur luh kawnga hmalatu pawl hrang hrangte inpekna ah lawmthu a sawi bawk a ni.

Chief Secretary Pu Lalnunmawia Chuaungo pawhin lockdown hi engtikah nge thlahdul a nih anga hlih a nih dawn tih ahriatloh a, tunah hian kan him thawkhat tawh angin inhre mah ila kan chhehvel min hualtute ah COVID-19 hri vei an pun chhoh zel avangin kan fimkhur a ngai em em a, tuna a lan dan chuan State pawn lam atanga rawn lut te atangin kai theihna chance a awm a ni a ti a. Phai lam nen kan inkalpawh lo thei silo a, phai lam atanga bungrua rawn phurh luh a ngai reng si a, phai atanga phurlut tute leh Mizoram atanga phai lama bungrua zuk la an awm reng lo teilo a, hei hi engtin nge him zawkin kan kalpui ang tih ngaihtuah a ngai a, Mizoram mi leh sa lockdown vanga phai lama tangkhang rawn haw turte pawh an la awm a, sawrkarin ruahmanna a siamte thuawih taka mipuiin kan zawm tlan hram hram rih a pawimawh dawn a ni a ti.

Vawiin meetingah hian Transport Department-in Mizorama bungraw phurhluh chungchanga zawm tur inkaihhruaina Standard Operation Procedure (SOP) a ruahman chu uluk taka sawiho niin, Mizoram mamawh phurtu driver leh handyman-te an him theih dan tur chi hrang hrangte sawiho a ni a, heng sawihona eng atang hian sawrkarin SOP mumal takin a duangchhuak dawn a ni.