Vawiin chawhma dar11.00 khan Transport Minister Pu John Rotluangliana chuan Aizawl tih lohva Mizoram-a a hmasa ber dawttu atan Kolasib-ah Smart Card hmanga driving licence leh motor registration siamtirna a hawng.He inkhawm hi District Transport Office, Kolasib Hmar Veng-ah buatsaih a ni a, inkhawm hi Transport Commissioner Pu Hrangtawn IRTS-an a kaihruai a ni.

Transport Minister Pu John Rotluangliana chuan,”Lirthei hi misualte pawhin hmanruaa an hman ber pakhat a ni a, chuvang chuan, sawrkarin India ram khawi hmun atang pawha lirthei neitu leh a khalhtu nihna chiangkuang tak hriat theihna tur siam hi tha a ti a. Ramri depa awm leh lirtheiin a pal tlang tamna Kolasib hi smart card hmanna atan kan thlang a ni” a ti. Pu John Rotluangliana chuan, “Lirthei neih aiin kan sahimna tur hi ngaih pawimawh zawk tur a ni” a ti a. Smart Card hman a nih chuan lirthei neitu leh khalhtu nihna pawh chetsual a thlen pawhin hriat a awlsam dawn a ni, a ti. Supply Minister a nihna angin Pu John Rotluangliana hian Thawhtanni atang khan motor hmanga Mizoram-a buhfai thiar luhna tur kawngpuite Guwahati thlengin a zawh chhuak vek a, “October thla tir atanga rel hmanga buhfai thiar a remchan dawn tak loh avangin mipuiten harsatna tlem kan tawk mai thei a; hetiang hun a lo thleng a nih pawhin indem tumna rilru nei lovin, tanrual a pawimawh a. Mizoram sawrkar chuan mipuite harsatna tawh theih chingfel turin rilru a seng mek a ni” a ti. Pu John Rotluangliana hian LPG lama Mizoram viltu, Pu JK Brahma, Area Manager chu Mizoram House-ah a ko va, Saiha district-in eirawngbawlna gas an harsat lehzual avanga LPG Dealer lak belh turin thu a rawn a, Pu Brahma chuan November thla chhunga Minister rawtna tihpuitlin hman a tum thu a lo hrilh bawk a ni.

Pu T.T.Zothansanga, Parliamentary Secretary pawhin thu sawiin, “ Ram leh hnam kan humhalhna kawngah fimkhur a tul a. Mizoram-a Chakma mipui awm zat chhiarpui neih hi an inlakhhranna tura rahbi siamsakna a ni thei a ni” a ti.

Vawiina Smart Card hmanga Driving licence leh motor registration tih theihna tur Kolasib-a hawn takah hian Kolasib-a officer-te chu DC Pu Jitender Yadav hovin an kal kim hle a; chanchinbumite hnenah a hmasa ber atan smart card hi pek chhuah a ni. Smart Card hman theihna hi district dangah pawh hawn thuai tum a ni a; Transport office-a kal buai kher ngai lova Internet hmanga mahni inchhung lum atanga lirthei registration leh Learner’s/Driving licence dilna thehluh theih turin sawrkar chuan ruahmanna a siam mek a ni.

Transport Minister Pu John Rotluangliana ruahmanna angin Aizawl-Silchar inkara tlan tur bus te chi, Sumo aia dawnghlawk leh chuan man tlawm zawk pawh vawiin khan 2 ruahman nghal a ni.