Transport Minister, Pu PC Zoram Sangliana chuan Krismas lo thleng turah tun thlenga chetsualna rapthlak a thlen loh avangin lirthei khaihtu zawng zawngte a fak a, fimkhur taka an lirthei khalh turin a fuih bawk. Minister chuan Kristian-te hunpui Lal Isua pianchampha lo thleng turah Zoram mipui zawng zawng hlim taka hmang turin duhsakna a hlan a. He kan hunpui atan hian Zoram mipui kan inbuatsaih mek zela, thingtlang hmun hrang hrang amite pawhin khawpuiah chakkhai an lam a, an kal leh haw phurtu lirthei khalhtute zawng zawng pawhin Pathian-in a duhtak mihringte phurtu an nih hre reng turin a ngen.

Aizawl leh Mizoram khawpui danga Taxi, Bus leh Auto Rickshow khalh tute pawh tluang taka service turin duhsakna a hlan a, an mi phurhte duat taka enkawl tur leh an duhna hmuna him taka dah zel turin a ngen nawn a. An lirthei ah thil theihnghilh a awm pawh in a neitu zawnga pe let chhunzawm zel turin a ngen a, an passenger-te lakah chuanman (fare) dik taka la tur leh he hunpui thleng tur denchhen a an lirthei chuan man bituk sa bak passenger-te lak sak lo turin a chah bawk a. Passenger te pawh an bungrua an theihnghilh emaw tih bo palh emaw a an mahni zawn chhuah an awlsam nan an hming leh address chiang tak lehkha ziak an bungrua or bag chhungah dah ching turin a ngen bawk.

Lirthei chimbuai lohva mipuite him tak leh zalen taka Krismas Bazar an kai theih nan kumin ah pawh No Vehicle Zone Aizawl khawpui chhung (Zodin to Chanmari) Ni 23-24 leh 31.12.2011 hian siam a ni leh dawn a. Hemi a hlawhtlin theih nana hma la tu zawng zawngte leh Lirthei neitu zawng zawng te hnenah pawh lawmthu a sawi nghal bawk.