Tukin zing khan Pu John Rotluangliana, Transport Department Minister chuan Lunglei khawpuia Transport Department hnathawkte Lunglei Circuit House- ah a kawm.

Pu John Rotluangliana chuan kum nga dawn Transport department a enkawl chhungin buaina leh harsatna lian tham nei lovin an kal a, department malah chuan revenue la lut hnem berte zing ami an nih thu  a sawi. Rs 15.5 Crores sum hmangin Hlimen Workshop-ah building sak tum a ni a, Aizawl khawpui chhung a tlan turin two wheeler taxi permit 500 pek chhuah a ni, a ti bawk.

DTO Pu Lalnundika chuan Lunglei District chhunga MV Act hnuaiah Revenue thla tin cheng nuai 30 atang 40 lakluh a ni a, Enforcement staff chu indaih se chu aia sang mah revenue  hmuh theih a beiseiawm, a ti. DTO chuan Minister hnenah mipui mamawhna a san avangin MST Bus pek belh tur te, office-in Internet connection tha zawk an mamawh thu te thlenin DTO nghet dah sak turin Minister hi a ngen bawk. Minister chuan an mamawhte leh harsatna an tawhte chu a theih ang anga sutkian sak a tum thu a sawi a ni.