No.2059/2021-2022

Aizawl the 31st August, 2021: Vawiin khan Transport Minister Pu TJ Lalnuntluanga’n Secretariat Conference Hall, MINECO-ah mipuiten online hmanga chhiah leh Transport Department atanga mamawh pawimawh hrang hrang awlsam taka an neih theihna tur online payment system a tlangzarh.

Minister Pu TJ Lalnuntluanga chuan lirthei neitute leh a hmangtute tan department dawr a awlsam theihna zawngin Department chuan ngaihtuahna nasa takin a seng a, vawiinah NIC, SBI leh Transport Department te thawhhonain online payment hawn a lo ni ta chu a lawmawm tak zet a ni, a ti. Transport Department chuan Online Payment siam tumin hun rei tak hma a la tawh a, buaipui ngai tam tak a awm bakah nikum lam atanga hripui leng avangin duh anga chakin hma lak a harsa a. Chutihrualin, lockdown avangin mipui tan motor kaihhnawih chhiah pek a harsat tak avangin Online Payment chu a hma thei ang bera buatsaih tulna nasa takin a nawr bawk a, vawiinah mipui hman theih tura tlangzarh a lo ni ta chu a lawmawm takzet a ni, Pu TJ Lalnuntluanga chuan a ti.

Transport Minister chuan Transport Department hmalakna hrang hrang he hunah hian a tarlang a. August ni 27, 2021 khan North East Ministers Conference Ports, Shipping and Waterways changtu Union Minister Pu Sarbananda Sonawal kaihhruaia neihah Inland water Transport a Mizoramin hma kan sawn ve theihna tur thlenin, sumdawnna lamah leh Tourism lama chhawr tangkai a nih dan tur te a thlen a. Khawthlangtuipui/ Tuichawng lui develop-na tur DPR chu pawm sakin inspection team rawn tirin hma lak a ni nghal dawn niin Minister chuan a sawi. Chhimtuipui luiah, Hnahthial bul - Tuipui D atanga Lomasu thleng lawngleng hmanga inkalpawh a nih theihna turin Ministry of Shipping in Techno Economic Feasibility Study E-Tender chhuah tura thurawn a pek angin tunah hian E-Tender chhuah tura peihfel vek tawh a nih thu Pu TJ Lalnuntluanga chuan a sawi a. National Waterway 102-a puan tawh Tlawng lui pawh passenger chuan theihna tura lawnga kalna turin hma a rang lama laksak turin a thlen tawh tih a sawi bawk.

Pu TJ Lalnuntluanga chuan passenger phur motorah Vehicle Location Tracking System bun turin Transport Department-in hma a lak mek thu a sawi a. Vehicle Tracking Device vuahna motor-ah chuan passenger ten an sahimna kawnga harsatna an tawh thulha hmeh tur Panic Button invuah an hmeh khan rang takin Transport Department leh Police lamin an hre thei nghal dawn a, a bik takin hmeichhiate himna atan a tangkai hle dawn, Minister chuan a ti bawk.

June ni 5, 2020 khan State Bank of India nen Payment Gateway chungchangah MoU sign niin, Transport Department, SBI leh NIC te tangkawpin Online payment hi mipui te hman tangkai theih turin an buatsaih a. Online payment hman theihna hi hlawm hnihah then a ni a. Vehicle Document kaihhnawih thil pawimawh - Registration, Permit renewal, Duplicate Permit, Tax Payment, Special Permit, Fitness renewal fee, Ownership transfer fee, Issue of NOC, Registration renewal, Duplicate registration certificate leh address thlak te chu parivahan.gov.in/parivahan/ kaltlangin a tih theih dawn a. Licence kaihhnawih – Learner licence, Driving licence, Conductor licence, Licence renewal, Hming, Address leh thlalak thlak, Duplicate driving Licence leh conductor licence leh Phone number update te chu sarathi.parivahan.gov.in/sarathiservice/ kaltlangin a dil theih dawn a ni.

Vawiin programme hi Transport Department Commissioner Pu KT Beicho chuan kaihhruaiin Transport Director Pu R.Lalrammawia bakah SBI leh NIC aiaawhten thu an sawi a. He programme-ah vek hian Transport Minister chuan Transport Department Year Book 2021 a tlangzarh bawk.