Kolasib Constituency bialtu Minister Pu P.C. Zoramsangliana, Transport Minister chuan a bial chhung chamchilh mekin vawiin khan Kolasib a Department hrang hrang hotute D.C. Conference Hall-ah a kawm a. Congress sorkar-in inthlan dawna a intiamna, a manifesto te ti hlawhtling turin sorkar hnathawk mitinte chu a taka thawktu an nih avangin sorkar-a rinawm tlat turin a ngen.
Pu P.C. Zoramsangliana chuan, Congress sorkar chu mitin ta a ni, tiin party thil avanga phuba lak nana insawn te a ti dawn lova ni, a ti a. Tun hmaa lo tih fo tawh sorkar hnathawk an party a vote thlak loh vanga transfer leh kalphung tam tak Mizoram-ah hian thlak a ngai a ni, a ti. Department tinte hnathawh leh hmachhawp te a mal malin officer ten Minister hi an hrilh hlawm a. Mipui leh ram rawngbawl nana chak lehzuala thawhho dan turte chipchiar takin Minister ho hian an sawi a ni.

Vawiin vek khan chawhma lamah Minister hian Horticulture deptt. buatsaih Flower Show chu Diakkawna Shopping Centre-ah a hawng bawk a ni.

Nimin khan Pu P.C. Zoramsangliana hian Bairabi, Meidum leh Pangbalkawn te a tlawh a, khaw tinah ropui taka lo hmuah a niin chawimawina pangparte hlan a ni. Heng khua ah te hian thu sawiin Minister chuan Mizoram-ah retheihna in a man beh tam tak kan awm. Chung mi hnuaihnungte chhanchhuak tur chuan Pu Hawla hruai sorkar thar a lo piang ta hi Pathian remruat a ni a, heng mite tana malsawmna ni tur hian kan thawk dawn a ni a ti. Hlemhletna an do tlat tur thu leh Lal Isua en chunga thawka Zoram tuam dam an tum thu Minister hian a sawi bawk.

Kan hma lawka V/C inthlan lo awm turah pawh hnathawk thei sorkar lai thlawptu ngei mi dik thlang chhuak turin Minister a chah a. Mirethei leh hausa inkar zau lutuk khaichhuah nana NLUP an duanchhuah chu Central in Zoram budget baka tangka vaibelchhe 600 sorkar kumthara a pek dawn thu te, Referral Hospital sorkar kalta in a hluihlawn tak chu tuaithara Medical College nen inkawp tura tih an tum thu te, Bairabi Tlawng Sairang lawngliana kalpawhna tur ruahman anih tur thu te, Kolasib a hmun awl ruahman theih a nih chuan Auditorium sak a nih mai theih tur thu te Pu Ramsanga hian mipuite a hrilh a. Mizoram-ah hian boruak muanawm tak hnuaiah hmasawnna hna thawk ila, invauna, inrikrapna leh inelrelna te bo tawh rawh se, a ti a ni.

Minister hi Aizawl leh Kolasib atangin department hrang hrang hotuten an tawiawm a. A nupui Pi Lalthlamuanin a tawiawm bawk.