No.2915/2021-2022

Aizawl, 8th November, 2021:Sub-Hqrs. YMA Champhai kuta Mizoram sawrkar Transport Department-in dan ang taka inremna siampuia Ambulance leh hnukchhuak motor Recovery Van a hawhtir Pathian hnena hlanna leh lawmthu sawina hun SYMA Hall, Tlangrawt, Champhaia buatsaih chu vawiin chawhnu khan Transport Minister Pu T.J. Lalnuntluanga chuan a hmanpui.

Transport Minister Pu T.J. Lalnuntluanga chuan hun rei tawh tak atanga Champhai District mamawh leh indaihlohnate phuhruk a nih theihna tura pawimawh tak Ambulance leh Recovery Van te Transport Department leh Sub-Hqrs. YMA tangkawpin inremna tha tak an siam avanga Champhaia dah a ni thei chu lawmawm a tih thu a sawi a. Mamawhnate a phuhruk ngei a beisei thu sawiin, dan anga a tul angte bawhzuia hmalak a ngaih avanga hun a duh rei deuh tak thu leh dan ang thlapa inhlan fel a ni thei chu lawmawm a tih thu a sawi bawk.

Pu T.J. Lalnuntluanga chuan dik tak leh felfai taka a tahtawla hmasawnna kalpui a tul thu sawiin, a enkawl Department Environment Forest & Climate Change hnuaiah Champhaiah Conservator of Forest (CF) post dah a nih tur thu leh, Law & Judicial Department kaltlangin Champhai Judicial District thar leh District Court sakna turte High Court in a pawmpui tawh thu a sawi bakah, District Transport Office thar sak thuai tum a nih thu a tarlang bawk.

Sub Hqrs.YMA Champhai hnena Ambulance leh Recovery Van hawh tir chu mipui ten an chhawr tangkai ngei a duhsak thu sawiin, YMA chu tanpui ngaite tanpuitu leh khawngaih rawngbawl kawnga penchhuak a nih thu sawiin, Mizo hnam a awm chhung chuan YMA chu a dai tawh dawn lo a ni, a ti a. YMA hotute chu midangte tana malsawmna ni tura thalaite zirtir leh an rilru puthmang siam dik kawngah tan la sauh sauh turin a chah a. Ambulance leh Recovery Van chu midang harsa zawkte tanpui kawnga tangkai taka hmang turin duhsakna a hlan a ni.

He hun hi Pu F.Lalrinmuana, President, SYMA Champhai chuan a kaihhruai a. Pastor K.Lianmunga'n Ambulance leh Recovery Van Pathian hnena hlanna hun a hmang a. Pu R.Lallawmzuala, Secretary, Sub-Hqrs. Champhaiin lawmthu sawiin hun a khar a ni.

October ni 26, 2021 khan Transport Director Er. Lalrammawia leh SYMA Champhai aiawh President Pu F. Lalrinmuana te chuan Ambulance leh Recovery Van inhawhtirna thuthlung ziakfelin Ambulance leh Recovery Van te inhlan fel a ni a. Sub Hqrs. YMA Champhai chuan Champhai District mipui mamawhnate hriatpuia hmalak saktu Transport Minister Pu T.J. Lalnuntluanga, Champhai South bialtu MLA ni bawk chungah lawmthu an sawi a ni.

Minister hian tukin khan a bial chhung ramri depa awm Zokhawthar a tlawh a, khawtlang mamawh leh harsatna an thlente a tul ang zela bawhzui sak a tum thu sawiin, thawhhona tha leh inpawh taka hmalak ho zel a tul thu a sawi a. Khawtlang hruaitute hnenah tanpuina pawisafai Rs 1,00,000/- (cheng nuai khat) leh tuizem lian 2 a hlan a, hemi hnu hian Melbuk Football Ground siam a tlawh nghal bawk.

Law & Judicial Minister ni bawk Pu T.J. Lalnuntluanga chuan vawiin chawhnu dar 3 khan Champhai Vengsang Mualbawk rama YMA Field hmun  leh a chhehvel District Court hmun tur  chu Official leh khawtlang hruaitute nen an enfiah nghal bawk a ni.

Minister Pu T.J. Lalnuntluanga hi Pu Lalrinpuia Varte SP, Pi Esther Leihang SDC, Dr. Lallawmkima DIPRO, Pi Josangzeli Tlau Judicial Magistrate, First Class leh Pu Lalrinzuala, Head Surveyor te'n an tawiawm a ni.