Vawiin khan Transport Secretary Pu Hrangtawna chuan Assembly Annexe Conference Hall-ah internet kaltlanga road tax leh passenger-goods (p&g) tax pekna tur e-payment system a hawng.

Transport Secretary chuan khawvel thang zelah internet hian awlsamna tam tak min siam sak a, India ramah pawh Digital India kalpui niin ram chhung hmun kilkhawr zawk thlengin internet-a thlunzawm tum a ni, a ti. Pu Hrangtawna chuan Mizoram sawrkar chuan e-governance kalpuiin Transport Department in e-payment system a hawn tak pawh hi e-governance hmalakna peng pawimawh tak a ni, a ti a. India hmarchhak state danga epayment system hawn tawhte chu commercial vehicle-te tan chauh a nih laiin Mizoramah erawh chuan a hawn ni atang hian commercial vehicle chauh ni lo mimal lirthei tiamin lirthei zawng zawng a huam a ni, a ti. Transport Secretary chuan vawiin 9.11.2015 atanga thla hnih chhung hian road tax etc la pe lote’n late fee chawi ngai lovin a duh tan e-payment system thar kaltlang hian a pek theih a ni tih a sawi lang bawk.

Road tax leh passenger-goods (p&g) tax pekna tur e-payment system hawn tak hi vahan.mizoram.nic.in niin State Bank of India internet banking neite tan hman theih a ni a. Debit card, credit card leh Bank dang internet banking kaltlanga pek theih dan tur pawh ngaihtuah leh tur a ni.

He e-payment hawn tak hman dan chu a hnuaia mi ang hi a ni:

Departmental portal - vahan.mizoram.nic.in ah lutin tax an pekna hnuhnung ber DTO thlan tur a ni a. Registration number bakah chassis number a digit tawp panga (last five characters) kha type tur a ni a. Chumi zawhah kan tax pek duh - road tax leh passenger-goods (p&g) inkawp emaw, road tax chauh emaw, p&g chauh emaw thlan tur a ni a, Get Details tih click leh tur a ni. Vehicle details a rawn tarlan kan endik hnuah “Tax Mode” tih click leh in “Calculate Tax” tih thlan tur a ni a. Kan tax pek tur zat chu a rawn tarlang zui mai dawn a ni. Hemi zawh hian mobile number leh a nei tan email id dah tur a ni a. State Bank of India tih chu thlangin “Enter Image” tihah khan Captcha image type luh leh tur a ni a, chumi zawhah “Make a payment” tih menu dinglama awm kha click leh tur a ni. Hlawhtling taka payment i siam hnuah “Print Payment” hmangin tax receipt hi print chhuah leh mai tur a ni.

Transport e-payment system hawnna inkhawm hi Transport Director Pu L.Biakthanga’n kaihruaiin NIC, SBI leh Transport Directorate IT Cell aiawhte’n report an pe a ni.