No.1691/2021-2022

Aizawl the 5th August, 2021 : Vawiin chawhma dar 10 khan MIZOFED LPG Truck phur pali chuan Tripura atangin Aizawl an lo thleng. Food Civil Supplies & Consumer Affairs Department Director Pi Ramdinliani, MIZOFED Chairman Pu K.Laldawngliana leh official dangten AMC Office kawt, Thuampui-ah an lo dawngsawng a ni.

Supply Director Pi Ramdinliani chuan mipuiten harsatna kan tawhloh nana thahnemngai taka hun leh tha hmang Supply Minister Pu K.Lalrinliana leh MIZOFED hnenah lawmthu a sawi a. Truck khalhtu te inpekna chu fakawm tiin, hun harsa tak karah Mizoram an lo thleng thei chu mipuite rawngbawltu an ni, tiin a sawi.

Supply Minister Pu K.Lalrinliana aiawhin Private Secretary Pu K.Zorammuana chuan driver te hnenah lawmthu sawina thilpek a hlan bawk a ni.

A vawikhatna atan Mizoram chuan Tripura atangin LPG a la lut tan ta a. LPG hi Bishalgarh Bottling Plant, Tripura atanga phurh luh a ni. Vawiin a lo thleng truck pali te hian LPG bur 1224 vel an rawn phur thleng a, an ni bakah hian truck 1 chu khawl lam harsatna avangin Mizoram a lut thei hrih lo a. Vawiin LPG phurh thlen hi MIZOFED-ah truck load 2, Zothan Indane Gas Agecy ah truck load 1, leh Biakkungi Gas Agency ah truck load 1-a insem tura ruahman a ni a. A lo thleng tur truck pakhat hi Suakchhunga Gas Agency in a chang thung ang.

Vawiin vek hian Mizoram Police Gas Agency, M&B Indane Gas Agency, Khatla leh Southern Gas Service, Lunglei truck te chuan Bishalgarh Bottling Plant, Tripura hi an pan bawk a ni.