Vawiin khan PHE Minister Pu Zodintluanga chuan a office-ah PHE leh ICT department hotute kawmin mipuiin tui bill internet kaltlanga online payment theih dan tur leh Water Billing System tihchangtlun theih dan tur an sawi ho.

PHE Minister Pu Zodintluanga chuan mipuiin tui bill an pek lo dawnsawn dan system hi tihdanglam a ngai tawh a, tui bill pekna tur software Information & Communication Technology Department-in PHED tana an ruahman hmangin PHE Department-in Aizawl khaw chhung hmun hrang hranga bill collection counter 12 a neih mekah he software hmang hian bill pekte chhinchhiah a ni tawh dawn a ni. He software hi hman a nih hunah computer hmangin reilote chhungin bill pek zat, bill pe leh pe lote a hriat zung zung theih tawh dawn a ni. Tin, hemi bakah hian mipuiten anmahni in lum atanga internet kaltlanga bill an pek theihna tur online payment tih theihna tur pawh buatsaih mek a ni a, hemi hi peihfel a nih hunah chuan awlsam takin bill collection counter-a kal ngai lovin mipuite chuan an tui bill an pe thei tawh dawn a ni.

Tui hi chhungkua zawng zawng nghawng a nih avangin a haw hun tur hi mipuiten an hriat theih a pawimawh avangin Minister chuan mipuite hriat theih turin tui haw hun leh tui bill zat sms alert pawh mipuite hnenah hriattir theih turin Department chuan hma a lak mek bawk thu a sawi.

Aizawl bakah district dang pawhin bill collection software hi an hman ve theihturinbuatsaih tur a ni a, nakinah online payment Mizoram pumpuiah tih theih a nih hunah Aizawl server nena thlunzawm theih tura ruahman nghal tum a ni. Online payment tihna tur hian PHED hian bill dawn khawmna tur bank account a neih a ngai a, chu chu Finance Department hnenah dil tur a ni a, Finance Department-in approval an pek theih hunah awmlsam takin mipuiten anmahni in chhung lum atangin tui bill hi an pe thei tawh dawn a ni. He online payment tih a nih theih nan hian ICT Department chuan online transaction facility (payment gateway) petu atana Govt of India-in a ruat National Securities Depository Ltd Database Management Ltd (NDML) pawh a be fel vek tawh a, tui bill pek dawn khawmna tur bank account hi Finance Department-in approval a pek hunah chuan awlsam takin tui bill hi pek theih a ni tawh ang.

PHE Minister Pu Zodintluanga chuan Sorkar chu mipui awlsamna siamtu tur a nih angin leh khawvel changkang chho zelah online payment tih theih hi a pawimawh hle a, mipui kan buai tawh avangin bill pe tura va chhuah nal nal te kan harsat tual tual avangin online payment ti thei tur hian PHE leh ICT department hotute pawhin tan an la nasa hle a, tih theih hun hi kan nghakhlel tawh hle a ni, tiin a sawi.

Vawiina tui bill online payment sawihonaah hian Pu C. Lalhmachhuana, Secretary, ICT leh Er R. Lalfanliana, Engineer in Chief, PHE leh Er Muanzoa, Chief Engineer, PHE leh PHE leh ICT officer dangte an tel a ni.