7/2026-2027

Kolasib, 1st April, 2026: Vawiin chawhnu khan Deputy Commissioner Office Chamber, Kolasib-ah Kolasib District chhunga tuialhthei leh eirawngbawlna gas (LPG & POL) dinhmun vil turin 'Joint Control Room leh Monitoring Cell' din a ni a. He thutkhawm hi Kolasib District Bawrhsap Pu H. Dolianbuaia'n a kaihhruai.

Bawrhsap Pu H. Dolianbuaia chuan he thutkhawm koh a nih chhan sawifiahin, Mizoram Chief Secretary in District Bawrhsap-te chu LPG leh POL stock awm zat leh sem chhuah dan uluk taka vil a, chhek ruk (hoarding), man to zawka hralh (black marketing), leh kawng dik lo va lak pen a nih loh nana hma la tura a hriattirna bawhzui a nih thu a sawi a. Kolasib District-ah pawh sorkar thuchhuah angin, danin a phalsak bak mimal hnenah tuialhthei leh eirawngbawlna gas hralh chhuah a rem loh thu a tarlang bawk a ni.

He thutkhawmah hian District mipuiten LPG leh Diesel/Petrol sem chhuah chungchanga harsatna an tawh emaw, chhek ru (hoarding) leh man to zawka hralh (black marketing) an hriat a, thuneitute hnena thlen zung zung theih nan Joint Control Room siam a ni a, District Monitoring Cell din nghal a ni bawk.

Joint Control Room Member-te:

* Deputy Commissioner, Kolasib
* Superintendent of Police, Kolasib
* District Civil Supply Officer, Kolasib
* DIPRO, Kolasib

Mipui ten thil diklo an hriat a an biakpawh theihna tur Helpline Number-te:

* 9402173753 / 9612474773

District Monitoring Cell:

* Convener: District Civil Supply Officer (DCSO), Kolasib.
* Asstt. Convener: Sub-Deputy Magistrate (SDC), Kolasib.
 * Member-te: Officer In-Charge (OC) Police leh Asstt. Controller Legal Metrology.