3691/2023-2024

Khawhai, 6th February 2024: Vawiin khan Krishi Vigyan Kendra (KVK), Khawzawl chuan Khawhai Town Hall-ah kuthnathawktute training an pe a. He hun hi 22-Tuichang bialtu MLA Pu W. Chhuanawma chuan khuallian niin a hmanpui.

Deputy Govt. Chief Whip ni bawk Pu W. Chhuanawma chuan he hunah hian Mizo te khawtlang nun siam that (social reformation) a ngaihpawimawh thu a sawi a. Khawtlang nun siam tha a, mizo nun ze mawi chawinung leh turin sawrkar, kohhran leh khawtlang hruaitute tanrualna a pawimawh a ni, a ti. Zirna, hriselna leh kuthnawthawh chawikan chu a ngaipawimawh ber te zinga mi an nih thu pawh sawiin, zirna bul thut (primary education) tih hmasawn a duh thu te, hriselna kawngah mitin ten inenkawlna tha an neih a duh thu te leh kuthnathawktute dinhmun chawi kan a duh thu te a sawi a ni.

He training ah hian kuthnathawktu kalkhawmte hnenah Dr. Malsawmkimi Senior Scientist & Head, Pi R. Vanlalduati Subject Matter Specialist (Soil Sc.), Pu Rambuatsaiha, Subject Matter Specialist (Agronomy) leh Pu Prakash Thapa, Farm Manager, KVK Khawzawl te chuan heng thlai hrang hrang Sawhthing, Hmarcha, Hmunphiah leh Aieng ah te zirtirna an pe a. Heng thlai hrang hrangte chin leh enkawl dan, natna chungchanga enkawl dan leh hlawk zawka thar theih dan tur zirtirna an pe a ni.