1772/2022-2023
Aizawl, the 1st September 2022: Tukin khan Pu C. Lalrinsanga, Agriculture Minister chuan Tuichangral Organic FPC Ltd thar lakhuihthei 15.7 metric tonnes chu Sonipat, Haryana leh a chhevel a hralh turin Ch.Saprawnga Truck Terminal, Rangvamual ațangin a vai liam.
Agriculture Minister Pu C.Lalrinsanga chuan kan thlai thar te man man zawka hralhna kawng a rawn inhawn belh zel a. Kuthnathawktute tana phurawmin tan lak sawt erawh a ngai tih a sawi a. Tunah hian pawn lama mamawh zat kan la thar pha lo hle a; India ramah heng kan thei leh thlai thar te hi duhtu an tam a, min dawrtu tur awm leh awm loh thuah harsatna a awm lo a ni a ti.
Kar hmasa lamah Sialhawk lakhuihthei chu Dy CM in ram pawna hralh turin a lo vailiam tawh a. Tunah ram chhungah Organic Lakhuihthei hralh tura kan thawn chhuak leh ta hi Mizoramin bungthar a kai chhunzawm zel tih a chiang a. Sawrkar ang leh kuthnathawktu tan pawh a phurawm hle a ni a ti.
Agri & Allied Sector hnuaiah Service Provider kan hman mek te an veng va in hmang chang an hre hle tih a sawi a. Anni tan hian hralh chhuahna buaipui chu thil harsa a nih loh rualin kan thlai leh thei thar te tam tham tak lakkhawm awlsam bawk si an hmuh zung zung theih erawh a ngai a ni a ti. India ram chu khawvela consumer market lian ber zing a mi a nih avangin Mizoram state economy hampuarna khawp sum chang thei thlai leh thei hralhna turah harsatna a awm dawn lo tih a sawi a. Thawnchhuah tura tam tham thar chhuak thei tura tan la chhunzawm zel turin farmer te a chah a ni.
Dr ZR Thiamsanga, MLA pawhin he hun hi a hmanpui a. Sawrkarin kuthnathawktute hmakhua a ngai a, a takin an tana thawk mek zel tih a sawi a. Council of Ministers meeting hnuhnung berin Grep chingtute tana hlawkna tura thutlukna a siam chu kuthnathawktute duhsakna a ni tih sawiin a bial chhunga Grep chingtute aiawhin lawm thu a sawi bawk a ni.
He program hi Pu J. Hmingthanmawia, Agriculture Secretary in a kaihhruai a. Lakhuihthei vailiam a nih hma hian Mission Organic Mizoram, Agriculture Department hnuaia service provider, Clover Organic Pvt Ltd in lakhuihthei thawn chhuah chungchanga hmalak dan report tawi an pe a. Lakhuihthei thawnchhuah hian a thlenna tur ni kar khat chhung velin a thleng hman dawn nia sawi a ni.
Tuichangral Organic FPC Ltd hi nikum 2021 khan Mission Organic Mizoram Agriculture department hnuaia din a ni a. Khawzawl district a khaw 8 - Khawhai,Sialhawk, Tlangmawi, Tlangpui, Chalrang, New Chalrang, Vangtlang leh Lungtan atangin lakhuihthei ching mi 500 in telkhawm a din a ni.
MOM hian FPC Ltd enkawl tur hian service provider atan Clover Organic Pvt Ltd hi a ruat a. Tukina vailiam tak lakhuihthei hi khaw 7 ațanga lakkhawm niin 20 metric tonnes phur thei Refrigerated Truck phai lam ațanga lo kalin a rawn phur a. Metric Tonne 20 beisei a nih laiin lak khawm theih zat chu 15.7 metric tonnes a ni ta zawk a. He lakhuihthei hi Surifresh Extract Pvt Ltd, Sonipat Haryana hnenah rate țha tawk taka hralh a ni. MOM hnuaia Service Providers te chuan lakhuihthei lei duh rawn betu an hmuh nual thu an sawi bawk a ni.
Attachment
- Loading attachment...
