PHE Department leh Central YMA tangkawpin tuihna humhalh beihpui an thlak kal zelah vawiin khan ‘Tuihna humhalh’ tih thupui hmanga Inter-branch YMA drama inchansiak chu Vanapa Hall-ah tan a ni ta. Parliamentary Secretary Pu Hmingdailova Khiangte chuan khuallian niin hawnna inkhawm a hmanpui a ni.

Pu Hmingdailova Khiangte chuan tuihna humhalh pawimawhzia hi mipui thinlungah tuh a tul a, kan ram chhunga tuihna kan neihte hi pawn lam mi tu mahin min humhalh sak dawn lova, kan tuihna neih mek te kan humhalh a, a tihpun dan kan zawn a tul a ni, a ti. Lemchan intihsiak hmang hian tuihna humhalh tulzia te, engtia humhalh tur nge, engtia bul tan tur nge tih te zir chhuak a, a humhalh hna hi mi tinte mawhphurhna a nihzia an zir chhuah theuh a beisei thu a sawi.

CYMA General Secretary Pu Vanlalruata pawhin ram siam tha a humhalh turin a chhunga chengte an pawimawh ber tiin Mizorama ramngaw vah chereu avanga tuihna kang chah nasatzia thlirin a humhalh kawnga hmalak chu thil tul leh hmanhmawh thlak a ni, a ti a. Lemchan thlirtu mipuite chu a changtute chetzia chauh en lova, a thu ken tel ngai pawimawh a, a taka hman tangkai tum turin a sawm a ni.

Tuihna humhalh Inter-branch YMA Drama Competition ah hian YMA Branch hrang hrang 40 an inel dawn a. Vawiinah hian branch 12 - Lengte Branch, Venghlui Branch, Chite Veng Branch , E.Lungdar Branch, Dinthar Branch, Chaltlang North Branch, Maubawk Branch, Zobawk Vengthar Branch (Lunglei), Ramhlun Vengthar Branch, Chhingchhip Mualpui Branch, Durtlang North Branch leh Durtlang Branch te an tel a ni.