June ni 6 zing dar 2:00 a ABCI hotu pahnih Meiduma anmahni Camp atanga Tuikuk hel pawl United Democratic Liberation Army inti te ruk bo chu tukin zing dar 8 bawr vel khan Mizoram sipai ten an tawmna hmun Assam ram chhunga Bangla Basha atanga 7km a hlaah nangchingin an chhan chhuak ta.
ABCI hnathawk rukbo zinga pakhat zawk Pu L. Dhiman (60), Project Manager chu Tuikuk hel pawl hotupa Doinaram Reang chuan a pum dinglamah kapin hliam na tak a tuar a. Helho tawmrukna camp an luh chhuah hnu hian helhote chu tlanchhe zui nghalin an zinga kal ve a tum loh avangin Pu Dhiman hi kah zui a ni tih a hmun a che police hote chuan an sawi a. Darkar chanve chhung an inkap zui a. Mizo sipai zingah hliam tuar an awm lo a, ABCI mite hi police te chuan hmun him lam an panpui ta a ni. Ruk bo dang Bajrang Lal Jain (44) erawh chuan hliam a tuar lova. Amaherawhchu a taksa a chau hle a ni.
Mizoram sipai te chuan mi ruk bote chhanchhuah hna hi kar hmasa nilaini atang khan nasa takin an bei a. Aizawl atanga sipai te bakah Kolasib District chhunga sipaite chuan Mizoram leh Assam ram, helho tawmrukna hi an dap hneh hle a.An rukbo atanga a ni 11 naah an hlawhtling ta a ni. Tuikuk helte tlanchhiatsan hmanrua engemaw zat sipaite hian an man a chungte chu AK mu 30, SLR mu 40 Battery leh thuamhnaw coumoflaged te a ni.
An mi rukbo Bajrang lal Jain sawi danin hel tehi an zavaiin mi 17 atanga 20 rual an ni a. Kum 20 atanga kum 25 inkar bawr vel hmel an pu a. Nitin Ke in thui tak tak an kal ziah thin a ni, ati a. Ei tur chungchangah anni hi Vegetarian an ni a,Buh(chaw) leh Dal tlem an pe thin tih a sawi a. Heng mite hian AK 47, Pistol leh chemte an nei vek niin a hmutu dangten an sawi bawk.
Assam ram chhung vek Genda atangin mi chhanchhuahte hi Buhchangah lak an ni a. Hliam tuar zawk hi a nat avangin leh a hliamah te thi a put reng avangin Genda atang hian Tuichhuahen Luiah Lawnglengin Buhchang thleng phurh a ni a. Buhchang atangin Kolasib Doctor leh medical team te enkawlna hnuaiah Kolasib thlenpui a ni. Pakhat zawk hi chu Bukvannei a ABCI camp ah lak rih phawt a ni.
A hmuna luhchhuahtu Pu HL.Thangzuala, Addl. SP,CID chuan heng mite chhanchhuak tur hian sawrkar tum a ruh em em a. Kolasib District SP leh Unit tina sipai te tan hona avang liau liau va hlenchhuak an ni, a ti. Hel hote hian anmi rukbo te tlan nan ABCI chu pawisa 5 crore pe turin an lo phut tawh a ni.
