1031/2022-2023
Aizawl, 23rd June, 2022 : Assam tuilian avangin Silchar-ah Mizo thenkhat harsatna tawka tangkhang an awm thu June ni 21, 2022 khan hriat a ni a. Mizoram Sawrkarin he thu hi a hriat veleh chhanchhuah dân tûr a ngaihtuah nghal a ni.
June ni 22, 2022 zing karah Mizoram Sawrkar hmalâkna in lawng engine nei pahnih chu Bairabi lamah ngaihtuah nghal a ni a, Truck hmangin Vairengte lamah phûrh chhoh nghal a ni. Vairengte ah hian Mizoram Police ASI R. Lalhmingliana hovin mi 28 lo inring sa te nên, Life Jacket 27 kengin Silchar-a Mizo tuilian avanga harsatna tawk mekte chhanchhuak tûrin Bus pakhat leh Sumo pakhat hmangin an tlan thla nghal a ni.
Rescue Team hian June ni 22, 2022 zan dar 9.30 velah Mission Compound, Silchar an thleng a. Hetah hian, Silchar YMA hruaitute nên a tuk leh zing aṭanga chhanchhuah hna thawk turin ruahmanna siam a ni a.
Vawiin ni 23.6.22 zing dar 6.30 vel atang khan Silchar YMA te leh Mizoram Police te chuan chhanchhuah hna an thawk tan a, chaw pawh ei mumal hman lovin an thawk char char a. Silchar khawchhunga tanpui ngai nia an hriat mi 33 chu an vaiin hmun him lam Mission Compound, Silchar ah hruai chhuah vek an ni ta a ni. Mizoram Police te hian, harsatna tawk te tan tui in tur leh tam hnem tur thil engemaw zat an pai bawk a ni.
Heng an mi chhanchhuah zîngah hian mi 16 te chu Mizoram lama lo haw tur an ni a, an lo hawna turin Vairengte atangin Sumo pakhat tirh belh leh a ni. Vairengte ah zanina an riahna tûr ruahman sak an ni bawk. NDRF leh Assam Regiment, Masimpur ten an chhanchhuah theih loh hnamdang mi 10 chuang te pawh Mizoram Police leh Silchar YMA tangkawp mi huaisen tak te hian an chhanchhuak tel nghe nghe a ni.
Heng atâna senso zawng zawng te hi DM&R, Mizoram Sawrkarin a tum a ni.
Attachment
- Loading attachment...
