185/2022-2023

Kolasib dated 18^th April 2022: Vawiin chawhma khan Tuirial Assembly Constituency bialtu MLA Pu K. Laldawngliana chuan Health Mela (Hriselna kutpui) Kawnpuiah a hawng.

Ni 18-22, April, 2022 chhunga Rural Development Block tin a kalpui tur Health Mela hi India ram Independence Day vawi 75-na lawmna - ‘Azadika Amrit Mahotsav’ pual a National Health Mission, Ministry of Health & Family Welfare buatsaih a ni a. Kawnpui Block Level-ah chuan Kawnpui Primary Health Centre-ah Health Mela hi buatsaih niin Dr. Lalawmpuia Chhangte, Chief Medical Officer, Kolasib chuan Health Mela hawnna hun a kaihhruai. District Hospital leh Kawnpui PHC a Doctor-te leh mithiamte’n Health Mela pual hian a thlawnin dam lo inentirna hun an hman bakah a thlawna damdawi pekchhuah a ni bawk.

Tuirial Bialtu MLA, Pu K. Laldawngliana chuan Health Mela chu mipuite’n ṭangkai taka an chhawr theih nan duhsakna a hlan a. “Rilru hrisel nei tur chuan taksa hrisel neih a pawimawh” tiin MLA chuan khumbet a dam loh chauha Doctor leh mithiamte pan tum lovin, natna lian zawk leh enkawl harsa zawk a thlen hmaa Doctor leh mithiamte rawn hreh lo turin mipui kalkhawmte a chah bawk. Pu K. Laldawngliana hian dam lo inentirte hnena a thlawna damdawi semin a daih lo a nih chuan a indaih lohna chu a tum sak tur thu a sawi bawk.

Kawnpui PHC Health Mela-ah hian Medicine, Surgery, Orthopedic (ruh lam), Pediatrics (naupang), AYUSH, Eye (mit), Dental (ha) leh Gynecology & Obstetric (Hmeichhe lam) Doctor-te a mamawh apiang tan pan theihin an awm a. Natna hri chi hrang hrang Tuberculosis (TB), HIV, Malaria, Non Communicable Diseases (NCD) te Screening-na hmun a awm bakah Covid-19 Vaccination kalpui a ni a. National Health Mission hnuaia thawktu hrang hrangte’n Health Mela pual hian mipuite tana pan awlsam turin an thawkchhuak a, PMJAY hnuaia Unique Health ID siamna Health Mela pual hian chhawpchhuah a ni bawk. He thu buatsaih lai hian Kawnpui PHC Health Mela a inentir hi mi 1100 vel an awm tawh a ni.