237/2022-2023

Kolasib dated 22nd April 2022 : Tuirial Assembly Constituency bialtu Pu K. Laldawngliana, MLA, Vice Chairman Commerce & Industrial Development Board ni bawk chuan vawiin khan WATSAN Sub-Division Office, Kawnpuiah a hawng.

Tuirial Bialtu MLA Pu K. Laldawngliana chuan NGO leh khawtlangin hun rei tak an lo nghah tawh, WATSAN Sub-Division Office, Kawnpui hawn a ni ta chu lawmawm a tih thu a sawi a, mipui hriselna atan a tui thianghlim neihna kawnga hmanraw ṭangkai tak a nih ngei a beisei thu a sawi. Mihring dam khawchhuah nana țul zual hmasa ber zing a mi chu tui thianghlim a nih thu sawiin PHE Department a thawktute kutah mipui hriselna a innghat thui hle thu a tarlang a, heng mawhphurhna lian tak hi theihtawp chhuah a hlenchhuak zel turin a fuih bawk a ni.

Tuirial bialtu MLA chuan “Ram siam ṭha turin tupawhin mahni awmna, hnathawhna hmunah ṭheuh lawm tak leh rawngbawlna  thinlung pu chunga, dik leh rinawm taka hnathawh a pawimawh hle a ni” a ti a, tih tak zetna leh hmasawn duhna nen sawrkar hnathawkte chuan mipui tan rawng an bawl a țul thu a sawi.

Er. H Lalsiamliana, Sr. Executive Engineer, PHED Kolasib WATSAN Division chuan Office hawnna hun hi a kaihruai a, Kawnpui WATSAN Sub-Division chu Kolasib District chhunga Sub-Division upa ber, Kolasib Rural WATSAN Sub-Division ni ṭhin chu a hming thlak a, Office pawh Kawnpuia sawn tak a nih thu a sawi.

Kawnpui WATSAN Sub-Division hian khaw 22 - Kawnpui, Bualpui, Thingdawl, Seṭhawn, Khamrang, Mualkhang, Hortoki, Zanlawn, Serkhan, Lungdai, Lungmuat, N. Chaltlang, Nisapui, Bukpui, N. Hlimen, Thingthelh, Mualvum, New Khamrang, Nazareth, Sentlang, Rajtali, Dilzaute a huam dawn a ni.

Kawnpui WATSAN Sub-Division Office leh SDO Quarters-te hi kum 2018 khan sak a ni tawh a, karleh thawhṭanni aṭang khian Office hi luah ṭan nghal a ni dawn a, Er. Lalawmpuia Sawthly chu Sub-Divisional Officer hmasa berin a awm dawn a ni.

Office hawnna inkhawmah hian Pi Rebecca Laldinmawii Hrahsel, SDO(C) Kawnpui; Kolasib WATSAN Division hnuaia PHED Officers leh thawktu hrang hrangte; Kawnpui khaw chhunga Village Council leh NGO hrang hrang hruaitute an tel a ni.